تصفح

سبحان الله وبحمده عدد خلقه ورضى نفسه وزنة عرشه ومداد كلماته ( ثلاثة مرات ) .

سبحان الله وبحمده سبحان الله العظيم ( 10 مرات ) كلمتان حبيبتان الى الرحمن وثقيلتان في الميزان




العودة   منتديات عالم الرومانسية > سياحية - سياحة وسفر > رحلات سياحية و حجز فنادق و عروض سياحية > سياحة اسيا و فنادق اسيا و عروض سفر اسيا

سياحة اسيا و فنادق اسيا و عروض سفر اسيا سياحة اسيا و فنادق اسيا و عروض سفر اسيا

رحلتى الى ماليزيا

إضافة رد
 
أدوات الموضوع انواع عرض الموضوع
قديم 12-10-2017, 05:45 PM   #1 (permalink)
@@ السعيد @@
أمير الرومانسية
 
الصورة الرمزية @@ السعيد @@
رحلتى الى ماليزيا





الحمدلله رب العالمين حمداً كثيراً طيباً مباركاً فيه يليق بجلال وجهه وعظيم سلطانه


أقدم هذا التقرير المتواضع بين أيديكم ليستفيد منه الجميع كما استفدت من عدد من التقارير،

لذا يمكنكم أن تعتبروه رد بسيط ورسالة شكر وعرفان لكم،

فكما قال رسول الله صلى الله عليه وسلم : ( من لا يشكر الناس لايشكر الله)






وقبل ما أبدأ بتقريري أود أن أشكر كل الأعضاء اللي ساعدوني في الردود على استفساراتي

وعلى الأعضاء اللي وضعوا تقاريرهم وتجاربهم اللي استفدت منها كثراً،

والحمدلله بفضل الله وبفضلكم جميعاً نجحت رحلتي الجميلة إلى ماليزيا


السؤال : ليش أخترت ماليزيا ؟؟ الجواب : ما كان في الحسبان أني أروح ماليزيا، كنت مخطط هالسنة أروح إلى دبي لمدة (10) أيام بعد عيد الفطر المبارك،

لأن الأطفال استانسوا من دبي المرة اللي طافت،

وفي يوم من الأيام وصلني رسالة إلى الإيميل من طيران القطرية وهي تخفيض على كل الوجهات بنسبة (40%) لمدة (5) أيام

ويكون آخر يوم للسفر هو (17 يونيو 2015) وتصفحت الرسالة وإلا تذكرة كوالالمبور (164) دينار بحريني،

لحظتها كنت في الدوام، على طول أتصلت في مدرسة أبني راشد قلت لهم متى يخلصون الامتحانات النهاية،

قالوا لي يخلص بتاريخ (18 مايو 2015) قلت لهم أكيد، قالوا لي أكيد، قلت تمام مع السلامة، يعني عندي (30) يوم للسفر قبل رمضان،

ورحت طيران على النت واختار رحلة الذهاب بتاريخ (20 مايو 2015) ورحلة العودة (10 يونيو 2015) من بانكوك، وإلا سعر التذكر مع التأمين (170) دينار،


على طول حجزت التذكرة.

وطبعاَ هذي راح تكون زيارتي الثانية إلى ماليزيا وسبب أختياري لها لأني في المرة الأولى ارتحت لها وايد واستانست وايد فيها وما شبعت منها،

وقلت هذي المرة أروح لها مع عيالي، واخترت تايلند أيضاً للاستجمام في بوكيت وللتسوق في بانكوك.


وقبل ما ندخل بالتفاصيل راح أخبركم عن بعض المواضيع اللي فادتني في سفرتي كثيراً

وهي برامج نزلتها على تلفوني الأيفون وهي كتالي :

رحلتى الى ماليزيا


والحين توكل على الله ونبتدي تقريرنا بالتفاصيل :


عدد أفراد الرحلة : (2) كبار (2) أطفال


عدد الأيام : (10) أيام ماليزيا (10) أيام تايلند


10 أيام ماليزيا موزعه على النحو التالي :

(2 ليالي في سيلانجور / 3 ليالي في كوالالمبو / 4 ليالي في بينانغ)


10 أيام تايلند موزعه على النحو التالي :

(4 ليالي في بوكيت / 6 ليالي في بانكوك)




التذاكر

رحلتى الى ماليزيا



الفنادق

رحلتى الى ماليزيا





@@ السعيد @@ غير متصل   رد مع اقتباس
قديم 12-10-2017, 05:50 PM   #2 (permalink)
@@ السعيد @@
أمير الرومانسية
 
الصورة الرمزية @@ السعيد @@
تكملة المقدمة

طبعاً قبل السفر الواحد يبحث ويفكر ويخطط، ويرتب أمورة قبل السفر، طبعاً كل ما كان التخطيط سليم كل ما كانت الرحلة حلوة ورائعة
على الرغم من أني سافر من قبل إلى ماليزيا إلا أني قعدت أبحث عن أماكن جديدة وأستفيد من تجارب الغير
في البداية تم ترتيب الرحلة وعدد الأيام في كل مدينة
وتم الوصول إلى هذه النتيجة

هذه الصورة تم تصغيرها . الحجم الافتراضي لها هو 915x635.


وبعدها تم التخطيط للأماكن السياحية اللي راح يتم زيارتها،
مع العلم إني أخترت الأماكن بعناية لإرضاء الأطفال لأن الرحلة هذي المرة علشانهم
وبعد الإطلاع على تقرير الأعضاء وتجاربهم والبحث عن وجهات الأطفال ولنا أيضاً نحن الكبار
تم الوصول إلى هذه النتيجة

هذه الصورة تم تصغيرها . الحجم الافتراضي لها هو 931x635.


مع العلم إني لم أستفد من هذا الجدول إطلاقاً لأن الكتابة أسهل من العمل
طبعاً طاقة تحمل الأطفال تختلف عن طاقتنا نحن الكبار،

فأحنا الكبار ممكن أن نطلع من الصبح إلى الليل، ولكن الأطفال بسرعة يتعبون فتم تغيير الجدول والأعتماد على حالة الأطفال
كنت إذا أطلع الأطفال الصبح لازم أرجع العصر علشان يرتاحون شويه وبعدها أطلع فليل،
أو أني أطلع من الصبح إلى المغرب وبعدها أريحهم، لأن إذا ما أرحتاحوا يزعجوني ويمللوني
وخصوصاً البنت الصغيرة إذا تعبت تبكي وفي النهاية تنام علي ولازم أشيلها
لذلك لم أعتمد كثيراً على الجدول وإنما أعتمدت على تعب الأطفال


والحين راح أطلعكم على الأدوات اللي صورت بها
طبعاً أخذت معي كاميرا فيديو سوني وكاميرا تصوير أيضاً سوني ولكن لم أستخدمهم بتاتاً
الكاميرات اللي استخدمهم هم

GoPro hero 4 black edition

وهي للتصوير في الماء في والتصوير العادي
وفيها ميزة أنها تصور بزاوية 170 درجة وعدستها عين السمكة


iPhone 6 + iPhone 6 plus


وأنتظروني في الحلقة القادمة تفاصيل اليومين الأول والثاني
@@ السعيد @@ غير متصل   رد مع اقتباس
قديم 12-10-2017, 06:04 PM   #3 (permalink)
@@ السعيد @@
أمير الرومانسية
 
الصورة الرمزية @@ السعيد @@


اليوم الأول والثاني
(20 + 21 مايو 2015)

يوم الأربعاء الموافق (20 مايو 2015) الساعة (2:00) ظهراً جهزنا شناطنا وسكرناهم وجهزناهم علشان نوديهم للسيارة لأني أدري راح تصيدني مشكلة مع الشناط وصندق السيارة وهي صورة الشناط
وبعد معاناه مع الشنط وصندوق السيارة تغدينا وتوكلنا على الله وطلعنا من البيت قبل الطيارة بـ (3) ساعات وكانت طيارتنا الساعة (6:20) المغرب، تحسباً لأي طارئ من زحمه أو حوادث السير وغيره، وأيضاً لأني راح أوقف سيارتي في مواقف المطار، والحمدلله الطريق كان سالك وما صادتنا أي زحمة أو أي شيء ووصلت مطار البحرين الدولي ورحت للمواقف اللي قريبة من المطار وهي (B) وهذي المواقف يتم احتساب مبلغ دينار واحد لكل يوم وهي قريبة من المطار وتقدر تروح لها سيراً على الأقدام لمدة 5 دقائق، وللعلم هناك (5) مواقف في مطار البحرين الدولي وهم (A,B,C,D,E)، موقف (A) وهو للفترات القصيرة لأستقبال وإنزال المسافرين وأسعارة تبدأ من (0 دقيقة إلى 20 دقيقة / 400 فلس) ومن (21 دقيقة إلى ساعة كاملة / 500 فلس) و (يوم كامل / 10 دينار)، والموقف (B) هو للفترات القصيرة والمتوسطة وسعره (1 دينار) لكل يوم وهذا الموقف تقدر تروح للمطار مشياً على الأقدام، والمواقف (C,D,E) هو للفترات الطويلة وسعره (1 دينار) لكل يوم وهذه المواقف بعيده قليلاً عن المطار ولكن المطار يوفر حافلة (24) ساعة مجانية لنقل المسافرين من المواقف إلى مبنى المطار والعكس.
المهم وصلنا المواقف (B) وإلى زحمة والموقف ممتلئ ومسكرين البوابة، كلمت الموظف قالي مليان الناس تدخل وماتحصل موقف وتطلع، قلت له مو مشكلة آنه بدخل وإذا ما حصلت بطلع قالي كيفك لكن آنه أقولك لا تدخل ووفر وقتك قلت له آنه مب خسران شيء كلها 5 دقايق وآنه طالع، ودخلت وقلت هالدعاء (اللهم لا سهل إلا ما جعلته سهلا، وأنت تجعل الصعب إذا شئت سهلا) دقيقة وإلا واحد طالع من موقفه ورحت وقفت مكانة وقلت الحمدلله الله سهل أمورنا، وأخذت لي جاري وحطيت فيه الشنط ورحنا على مبنى المطار، دخلنا وإلا كاونتر طيران القطرية مفتوح ومافيه زحمه وعملنا الشيك إن ودخلنا المطار وتمشينا، ومثل العادة في كل سفرة الأطفال يدخلون السوق الحرة وكل واحد ياخذ له حلاوة أو كاكاو صارت عادة عندهم، وبعدها رحنا على ماكدونالدز وغدينا الأطفال وشويه وإلا ينادون على رحلتنا التوجه إلى البوابات ورحنا على البوابة وطلعت البوابة الروحه للطيارة بالباص، نطرنا الزحمة تخف وركبنا الباص ورحنا الطيارة، وأحنا في الباص قاعد أدور طيران القطرية مب محصلة أقول في قلبي أكيد الباص مضيع أو بيودونا على طيران الخليج، وشوي إلى الباص وقف يم طيارة لونها بيضاء وفيها أخضر وعليها ومكتوب عليها المها، أحترت قلت شسالفة ركبت الطيارة والطيارة من داخل كراسيها لونها أخضر وكانت الطيارة جديدة جداً فعرفت أنها تابعة للطيران القطري ولكن ما عرفت ليش الطيران القطري مسويين جذي، هل بيسوون شركة طيران ثانية تابعة لها وأسمها المها أو أنهم راح يغيرون أشكال طياراتهم، الله العالم.
طارت الطيارة متأخرة ربع ساعة وآنه قلبي يحاتي الطيارة اللي بعدها اللي من الدوحة إلى كوالالمبور لأن الترانزيت فقط (50 دقيقة) وأحنا تأخرنا (15 دقيقة) يعني ما بقى لنا إلى (35 دقيقة)، وصلنا مطار الدوحة وقمت وكلمت المضيفة قلت لها أبي أنزل بسرعة لأن عندي رحلة وما بقى لي وقت، تقولي أنطر شوي ويقوم واحد ثاني نفس حالتي ويشرشح المضيفة وخلالها ما تسوى فلس حمر ههههههه، المهم كانت الطيارة واقفة بعيد وما كان خرطوم كان باص ولين ما نزلنا إلى الباص ووصلنا مبنى المطار ومشينا بسرعة بسرعة شوي إلى اليهال يبون يروحون الحمام، كلش كلش كلش مب وقته، لقينا حمام في طريقنا ودخلناهم بسرعة بسرعة ورحت سألت موظف عن مكان بوابتنا وقالي روح سيدة وآنه أمشي وأمشي طلعت بوابتنا بعيدة، ويوم جربت من البوابة وجفت لين الحين في ناس واقفين يبون يدخلون البوابة أرتحت وقعدت أمشي على راحتي لين ما وصلت البوابة ودخلنا الطيارة وإلا الطيارة كانت مب مليانة، وهم بعد هالطيارة تأخرت نص ساعة بسبب الناس اللي مثل حالتنا، وأول ما ركبنا الطيارة قدموا لنا المناديل المعطرة وعلى الساعة (7:40) طارت الطيارة، وبعد (45 دقيقة) قدموا لنا عشاء الأطفال لأني كنت طالب وجبة خاصة للأطفال، وكانت على شكل شنطة سبونج بوب وفيها باستا على كرات اللحم وعصير وكيك وكاكو وبسكوت، وهذي صور لوجبة الأطفال
وبعدها بربع ساعة تقريباً قدموا لنا قائمة الطعام وبعدها وزعوا علينا العشاء، وكان العشاء صدر دجاج عليه صلصه الطماطم وبطاطس مهروسة وكان معه كاكو وكيك بالشكولاته وسندويش مع زبده، وكان الأكل لذيذ وهذي صورة لعشائنا
وبعد الأكل وزعوا الشاي والكوفي والأشربة، وبعدها سكروا المصابيح ونمنا، وكل ساعة تقريباً يمرون علينا بالمشروبات أو بسلة فيها أنواع من الكاكو والجبس، واللي نجح فينا ولدي راشد محد كان جالس جنبه وأنسدح ونام ما شاء الله عليه طول الرحلة، وهذي صورة من السناك اللي وزعوه علينا
وقبل ما نوصل بساعة بدأت الشمس تشرق وتظهر ملامح الغيوم وكانت في غاية الروعة وكأنه رسمة رسام سبحان الله وإليكم صور السماء والغيوم ومعها ملامح من الأراضي الماليزية
@@ السعيد @@ غير متصل   رد مع اقتباس
قديم 12-10-2017, 06:07 PM   #4 (permalink)
@@ السعيد @@
أمير الرومانسية
 
الصورة الرمزية @@ السعيد @@

وعلى الساعة (8:30) وصلنا إلى مطار كوالالمبور، نزلنا من الطيارة وطبعاً من الطيارة إلى عزكم الله الحمام مساكين الأطفال أول ما قعدوا من النوم سيدة يبون يروحون أعزكم الله الحمام، وبعده مشينا إلى ما وصلنا هالمكان
وبعدها رحنا عبر الميترو إلى مبنى الآخر اللي فيه الجوازات واستلام الأمتعة، والحمدلله كان المطار فاضي والجوازات كانت فاضية ومافي أحد، خلصنا من الجوازات وبعدها رحنا أستلمنا شناطنا ورحنا لمكتب تاكسي المطار وقلت له أبي تاكسي إلى فندق صنواي لاجون،قالت لي جم شخص وجم شنطة, قالت لها (2) كبار و (2) أطفال و (5) شنط، قالت لي (167) رينغت لأن يبي لكم سيارة كبيرة، ودفعت ورحت لمكتبهم خارج المطار وعطيتهم البطاقة وودوني حق باص وقالي هذي سيارتكم، ركبوا الأغراض وركبنا ومشى بنا السائق متوجهاً إلى فندق الصنواي لاجون وهذي صور من طريقنا إلى الفندق
وبعد تقريبا (45) دقيقة وصلنا إلى الفندق، وأول ما وصلنا ودخلنا الفندق حسيت بفخامة مو طبيعية، كان مدخل الفندق واللوبي جداً فخم وكبير، ورحت للأستقبال وأعطيتهم الفوتشر، وقعدت تسوي الإجراءات وقالت لي تبي تسوي ترقية لغرفتك قلت لها كم راح تكلفني قالت لي (390) قلت لها لا ما أبي وايد، كلمت مديرهم وردت قالت لي آنه كلمت المدير وقالي (350) وبعد مشاورات مع أم العيال توكلنا على الله وعملنا ترقية من غرفة بريمير إلى غرفة كلوب، وكان في الفرق بين الغرفتين (الأسرة في الكلوب أكبر من البريمير، الكلوب في الطوابق العلوية والبريمير في الطوابق السفلية، الكلوب تكون مطلعه على الحديقة، الكلوب فيها مشروبات الظهر وكوكتيلات العصر مجاناً، والكلوب فيها غسيل وكي 3 قطع مجاناً يومياً، والكلوب أيضاً تقدر تفطر في مطعم طابق الكلوب ولكن المطعم صغير بعض الشيء)، وهذي صور لفندق صنواي لاجون والغرفة
هذي مدخل الفندق
وهذا اللوبي
وهذي المصاعد
وهذي الممرات المؤدية إلى الغرف
وهذي أهي غرفتنا
وهذ صور الغرفة بكاميرا تلفون الآيفون
وهذي صور أعزكم الله الحمام بكاميرا الآيفون
وهذي صورة الغرفة بكاميرا القوبرو
وهذي صورة أعزكم الله الحمام بكاميرا القوبرو
وهذي إطلاله الغرفة
وهذي المطعم الخاص بفئة الكلوب
وهو مطعم الفطور ومكان الشاي وقت الظهيرة ومكان الكوكتيلات وقت العصر
وبعد ما خلصنا إجراءات الدخول إلى الفندق استلمنا البطاقات رحنا الغرفة ويابوا شناطنا بسرعة ما تأخروا، وبعدها أخذنا دوش، وقلنا بنام شوية وبنريح، الأطفال طبعاً نايمين في الطيارة وشبعانين نوم هههههههههه، أحنا كلش حالتنا حاله، الأطفال قعدوا العبوا في الأيباد مالهم وشبكناهم لهم على الواي فاي وكل واحد شغل له فلم وقعد يطالع وأحنا نمنا تقريباً 3 ساعات، كان المخطط أن نروح حديقة الماينز وندرلاند ولكن كنا تعبانين وراحت علينا نومه، وقلت مالنا إلى مجمع البراميد وبدلنا ملابسنا ورحنا تمشينا في المجمع وكانوا بعض المحلات عاملين تخفيضات، تمشينا وتسوقنا من المجمع وأشترينا للأطفال ملابس، وبعدها أشترينا أيسكريم من ماكدونالدز وكملنا تمشيتنا لين ما الأطفال استسلموا وتعبوا، قلنا نشتري لهم عشاء ونخليهم ياكلون في الفندق، وكان أقرب شيء لنا ماكدونالدز وأخذنا لهم وجبات ورجعنا الفندق، راشد تحمل ووصل لين الفندق لكن شوق مسكينة تعبت وشلتها ونامت على كتفي لين وصلنا الغرفة ونامت بدون عشاء، وبس تعشينا وقعدنا شويه ونمنا.
@@ السعيد @@ غير متصل   رد مع اقتباس
قديم 12-10-2017, 06:12 PM   #5 (permalink)
@@ السعيد @@
أمير الرومانسية
 
الصورة الرمزية @@ السعيد @@
اليوم الثالث (22 مايو 2015)

هذا اليوم أسميه يوم الوناسة والتعاسة وراح تعرفون ليش سميت هذا اليوم بهذه التسمية، المهم قعدنا الساعة (8:00) من النوم وذهبنا إلى مطعم الفطور في الطابق اللوبي لأنه أكبر وفيه تعدد الأطباق أكثر من طابق الكلوب اللي حجمة صغير، وأول ما دخلت المطعم، تفاجأت من كبر حجم المطعم والأطباق المتعددة اللي تخليك تحتار شنو تاكل، وبعد ما فطرنا صعدنا الغرفة على الساعة (9:00) وبدلنا ملابسنا وجهزنا شنطتنا ونزلنا إلى اللوبي كان فيه مكتب عند مدخل الفندق من الداخل تابع حديقة الصنواي لاجون وسألته عن أسهار التذاكر وقالي (150 رينغت) للكبير و (120 رينغت) للصغير هذي صورة للأسعار
ودفعنا لهم المبلغ وأعطونا تذاكر الدخول وهي عبارة عن ساعة ورقية تلف على اليد، وقالنا شلون نروح للحديقة عن طريق الفندق، ورحنا على وصف الموظف وهو نزلنا من مصاعد الفندق إلى الطابق الأرضي وبعدها طلعنا على بركة سباحة الفندق، وبعدها تمشينا في هالممرات
إلى أن جتنا بوابة من حديد وفيها أكسس بطاقة غرفة الفندق، يعني ما تفتح البوابة إلا إذا وضعت بطاقة الغرفة، وهي بوابة خاصة لفندق الصنواي لاجون وبعد ما دخلنا توجهنا إلى كاونتر اللوكرات وأخذنا لوكر كبير نسيت السعر لكني إذا ما خابتني الذاكرة كان (39) رينغت، وحطينا أغراضنا ورحنا على المسابح ولعبنا في الألعاب المائية الزحاليق، وبعدها بدلنا ملابسنا ورحنا لعبنا في الألعاب الالكترونية وتمشينا في حديقة الحيوانات، صورت صور كثيرة للحديقة بس ما أدري وين راحت وهناك بعد ما تقدر تاخذ راحتك في التصوير، والحين أترككم مع بعض الصور البسيطة للحديقة
وبعد ما خلصنا من اللعب في الحديقة الالكترونية وتمشينا في حديقة الحيوانات، رحنا لمطعم برجركينج وطلبنا غداء من عنده وأخذنا وجبه عائلية فيها (4) وجبات وكانت بسعر (64 رينغت)، وبعدها وأحنا طالعين مرينا على كشك يبي بيطخ أحمر وشرينا من عنده صحن صغير بسعر (10 رينغت) وماء بسعر (5 رينغت) وطلعنا من الحديقة تقريباً على الساعة (4:30)، ورحنا إلى غرفتنا للاستحمام والراحة قليلاً وبعدها الذهاب إلى مجمع البراميد، وبصراحة ما أتوقعت أن الحديقة رائعة وكبيرة واستانسنا فيها وايد أحنا الكبار وأيضاً الأطفال (وهذي أهي الوناسة).
(أما التعاسة فهي) دخلت أم العيال الحمام أعزكم الله تسبح الأطفال وبدأت بشوق وعندما أم العيال تسبح شوق قامت شوق الله يهداها من البانيو تبي تاخذ الصابونة وجان تزلق وتطيح على حنجها على طرف البانيو وجان ينشق ويتبطل حنجها تقريباً 2 سم إلى 3 سم وصار الجرح عميق لدرجة أن عظم الفك السفلي بين من عمق الجرح، ومع الطيحة بعد عضت على لسانها وأنقطع جزء بسيط منه وقام الدم يطلع من حنجها ولسانها، وبسرعة بسرعة اتصلت حق الفندق قلت لهم بنتي طاحت في الحمام وأبي سيارة حق أقرب مستشفى، نزلت بسرعة إلى اللوبي ورحت للاستقبال وقلت لهم آنه اتصلت لكم أبي سيارة للمستشفى أخذوني لأستقبال السيارات برع الفندق وقالي أدفع (17) رينغت حق السيارة للمستشفى، دفعت وركبنا السيارة إلى المستشفى وكان المستشفى قريب من الفندق وكان أسمه صنواي وهو تابع لشركة الفندق.
وأول ما وصلنا المستشفى رحنا على طول إلى الطوارئ وعملوا لنا تسجيل دخول ونادوا الدكتورة وعاينتها وقالت لنا يبي لها خياطة، ولازم ننومها في المستشفى على الأقل يومين علشان نخدرها تخدير كامل ونسوي لها الخياطة وراح تكلفك هالعملية (6000) رينغت، قلت لهم المبلغ وايد وآنه بكرة بطلع من الفندق وبروح كوالالمبور، قالت لي الدكتورة عيل مافي إلا نسوي لها العملية الحين بدون تخدير كامل راح نخدر فقط المنطقة ولكن إبرة المخدر مؤلمة وقلت لي بعد بشرط أنكم تساعدونا في مسكها، قلت لها أوكي موافق، قالت لي هذي العملية راح تكلفكم تقريباً (2000 إلى 3000 رينغت) قلت لها مو مشكلة، قالت لي روح المحاسبة وأدفع (3000) رينغت، وإذا طلع المبلغ أقل رجعنا لك المبلغ، وإذا طلع أكثر أدفع الفرق، قلت لهم الحين ما عندي (3000) رينغت عندي بس (1500) رينغت، وفلوسي الباقي في الفندق، قالوا لي روح الفندق جيب الفلوس وتعال، ورحت لأستقبال المستشفى قلت لهم أبي تاكسي وأخذتني الموظفة إلى جهاز السامسونغ تاب وكان في البرنامج اللي ذكرته في المقدمة عن طلب التاكسي وعملت لي طلب للتاكسي، أنتظرت 15 دقيقة ووصل التاكسي، قلت له ودني فندق صنواي لاجون، قام الغبي ووداني فندق البراميد، قلت له أبي فندق صنواي لاجون، قال أوووه نسيت وقالي عاد الحين لازم نطلع على الشارع الرئيسي وما أدري شنو قلت له سوه اللي بتسوية يالله بسرعة وصلنا الفندق، ووصلنا الفندق بعد 20 دقيقة من الحواطه، أخذت الفلوس ورجعت أخذت سيارة من الفندق بنفس السعر عطيتهم (17) رينغت إلى المستشفى، ورحت للمحاسبة ودفعت لها (3000) رينغت وأعطوني رصيد وبعدها دخلوا بنتي إلى غرفة العمليات وربطوها جسمها كله بأحزمة وأنه ماسك يدها وممرضة ماسكة رجلها ووممرضة ثانية ماسكة راسها، وأهي مسكينة تصيح من قلب، وبعد معاناه قدرت الدكتورة تطق إبراه المخدر الموضعي، وانتظرنا شوية وبعدها خيطت الدكتورة الجرح بـ (3) غرز من الداخل وبعدها (5) غرز من الخارج، وبعدها غطوه بالقطن واللزاق وطلعنا، وقعدنا ننطر حوالي نصف ساعة لين ما يحسبون تكاليف العملية، وبعدها نادتني المحاسبة وقالت لي الحساب كامل طلع (1980) رينغت وراح نرجع لك الفلوس الباقية وأعطوني باقي المبلغ ودواء مسكن للجرح، وأخذت الفلوس ورحت على الاستقبال وقلت لها أبي أتصل حق الفندق أطلب سيارة، وأتصلنا حق الفندق وطلبنا سيارة ترجعنا إلى الفندق قالي (25 رينغت) قلت له ليش آنه مساعة رحت المستشفى مرتين بـ (17) رينعت، قالي إذا طلب السيارة ناخذ عليك (50%) زيادة، قلت له أوكي آنه أنتظركم في المستشفى، واحنا ننتظر شفت ستاربوكس في استقبال المستشفى ورحت شريت للأطفال (2) دونات، وبعدها نطرنا حوالي (5) دقايق وإلا السيارة عندنا رجعنا الفندق ورحنا للغرفة وقعدت مع شوق أواسيها وأحضنها وأحاول العب معاها وأضحكها لين ما جفتها صارت شوية طبيعية لأنها كانت خايفة ومن كثر البكاء والصراخ تعبت، قلت لها تبين أوديج المجمع أشتري لج لعبة، قالت إي.
وبدلنا ملابسنا نزلنا على مجمع البراميد وإلا أغلب المحلات بدأت تسكر لأنها كانت الساعة (10) فليل، فرحت بسرعة بسرعة إلى مطعم الطربوش علشان نتعشى عنده (على توصية الأخت قصة حب) ويوم وصلنا عنده إلى طلع المطعم فاتح ومايسكر إلا الساعة (11)، دخلنا المطعم وطلبنا حمص وبطاطس وطبق روبيان مشوي وطبقين كباب مع رز وطلع الحساب (178) رينغت، وهذي صور للعشاء
وبعد ما خلصنا عشاء طلعنا على المجمع وإلا كل المحلات سكرت، وقلنا خلاص خلنا نرجع الفندق ونرتاح بعد هالتعب، وفي رجعتنا إلى الفندق مرينا على ساحة التزلج وإلا كان في مباريات هوكي الجليد واستانسو الأطفال وقعدوا يجوفون ويشجعون، وكان جنبنا ماكدونالدز قالوا الاطفال يبون آيسكريم وشريت لهم آيسكريم، وقعدنا نجوف المباريات لين (12:15) قلت لهم بس يالله خلاص خلنا نروح الغرفة صرنا تعبانين وورانا تجهيز الشناط، وبس ورجعنا الغرفة ورقدنا الأطفال وقعدنا أنا وأم العيال نرتب الشنط ونسكرهم لأن بكرة راح نروح إلى كوالالمبور، وبعد ما رتبنا الشنط نمنا.
ولين هني خلصنا حلقة اليوم الثالث
أسمحولنا اليوم ما صورنا صور وايد لأن كنا في الحديقة وبسبب الحادث اللي صار
وهذي مصاريف اليوم الثالث
@@ السعيد @@ غير متصل   رد مع اقتباس
قديم 12-10-2017, 06:22 PM   #6 (permalink)
@@ السعيد @@
أمير الرومانسية
 
الصورة الرمزية @@ السعيد @@

اليوم الرابع (23 مايو 2015)



قعدنا الصبح الساعة (9:00) صباحاً واستحمينا وبدلنا ملابسنا وصكينا باقي الشناط وجهزناهم ونزلنا إلى الفطور، وتفطرنا من الفطور الطيب وتمشينا شوية في الفندق وبعدها رجعنا إلى غرفتنا، وريحنا شويه لين الساعة (12:00) أتصلت على السيرفس علشان ياخذون شنطنا ونعمل خروج من الفندق، وصل الموظف وأخذ الشنط ونزلهم وآنه رحت على الاستقبال مال جناح الكلوب وما كان فيه أحد وعملت خروج من الفندق وكانت خدمتهم سريعة، ونزلنا إلى اللوبي ورحت لأستقبال سيارات الفندق وقلت له أبي سيارة كبيرة إلى فندق أسكوت كوالالمبور، قالي (91) رينغت قلت له تمام، مايميز سيارات فندق الصنواي لاجون أنهم سيارات جديدة ونظيفة جداً، المهم حملوا الشناط إلى السيارة وركبنا وكان الطريق شوية زحمه ووصلنا بعد حوالي (40) دقيقة، وكانت الساعة تقريباً (1:00) ظهراً، وأول ما وصلنا نزلوا شناطنا من السيارة وآنه توجهت إلى استقبال فندق أسكوت كوالالمبور وأعطيتهم الفوتشر ورحبوا فيني وأخبرته أني أبي شقة في أعلى طابق ممكن وأبي إطلالة الشقة على الشارع أو على البرجين، قالي أوكي وقعد يدور في الكمبيوتر، وبعدها قالي في شقة في الطابق (13) لكنها مب جاهزة إذا ممكن تنتظر نصف ساعة علشان يجهزونها، قلت له أوكي آنه ما عندي أي مشكلة، قعدنا شويه في اللوبي وطلعت شوية برع الفندق أستكشف المكان وأول ما طلعت من باب الفندق جفت بوابة على جهة اليسار وعليها إعلان ورحت دخلت البوابة إلى بقالة متوسطة فيها بعض الاحتياجات اليومية، وشريت للأطفال حلاوة يضيعون وقتهم فيها، وبعدها رجت إلى اللوبي، وقعدت أفكر قلت ليش أضيع وقتي في الأنتظار ويمكن يطولون أكثر من نصف ساعة، رحت للموظف قلت له آنه بروح الأكواريوم ومجمع سوريا وبعدين برجع لك قالي أوكي، وطلعنا من الفندق متوجهاً إلى الأكواريوم مشياً على الأقدام لأنه جداً قريب بس يبي لك تعبر الشارع من خطوط المشاة وهو مقابل الفندق تقريباً، يمكن مشينا 5 دقائق فقط، ونزلنا إلى الأكواريوم لأنه في الطابق السفلي وإلا زحمه لأنه كان يوم السبت، رحت للكاونتر وأخذت 4 تذاكر 2 للكبار و2 للأطفال ودفعت لهم (190) رينغت، ودخلنا الأكواريوم وتمشينا وكان حدة زحمة وهي صور لبعض الأحواض




























































@@ السعيد @@ غير متصل   رد مع اقتباس
قديم 12-10-2017, 06:25 PM   #7 (permalink)
@@ السعيد @@
أمير الرومانسية
 
الصورة الرمزية @@ السعيد @@


وبعدها قالوا لنا ترى باقي (10) دقائق عن إطعام أسماك القرش ورحنا بسرعة وإلا عالم ناس شكثرها قاعدة هناك ما حصلنا مكان نوقف أو نقعد فيه، وهي صور المكان اللي يتم إطعام فيه سمك القرش











عاد هالسلحفاء يننتهم، كل ما يبون يأكلون سمك القرش أتيي هالسلحفاء وتاكل أكلهم، وكل ما يحطون الأكل على الأرض راح تدخل راسها في سطل الأكل وتاكل هههههههه كانت نكتة

قعدنا شوية خلينا الأطفال يجوفون وبعدها مشينا لأنه كان خنقه، وبعدها طلعنا من الأكواريوم


وبعدما طلعنا من الاكواريوم تمشينا شوية في حديقة المقابلة للبرجين والتقطنا هالصورة للبرجين على السريع



وبعدها توجهنا إلى مجمع سوريا، دخلنا المجمع وأحنا حدنا جوعانين والاطفال يدورون ماكدونالدز يبون ياكلون برجر، لكن قلت لهم بوديكم تشيليز، ورحنا مباشرة إلى مطعم تشيليز وكالعادة زحمة تكتب أسمك وعدد الأشخاص وتنتظر، وأنتظرنا (5) دقائق وحصلوا لنا طاولة لكن يا أهي طاولة في أحسن مكان في المطعم وهي مطلة على الحديقة وإطلالتها رائعة، وقعدنا ونسينا الطلب، وهذي صورة للإطلالة وفيها يبين فندق جراند حياة





بانا الموظف يقولنا ما تبون تطلبون، قلنا له أوكي بس دقيقة، وبعد مشاورات مع الاطفال راشد قال ابي برجر وشوق قالت أبي باستا، وآنه أخذت طبقي المفضل وهو فاهيتا الدجاج وأم العيال طلبت باستا بالروبيان وطلنا بطاطس مقبلات، وبعد ما خلصنا من الغداء وطلنا الفاتورة حسيت أن المبلغ شوي على اللي كلناه، قعدت أراجع الفاتورة وإلا وجبات الأطفال مب محسوبة، ناديت الموظف وقلت له ترى وجبتين مب محسوبين، قالي لأنكم طلبتوا وجبيتين للكبار فـوجبات الأطفال مجاناً وهذي صورة للفاتورة تبين عدم احتساب وجبات الأطفال



قلت له شكراً ودفعت وطلعنا ورحنا إلى الطابق الأخير إلى بتروساينز، وقالوا لنا ما ننصحكم تدخلون لأن باقي ساعة ونص ونصكر، والجولة يبي لها (3) ساعات أو أكثر، فيفضل تزورونا بكرة وتاخذون راحتكم أفضل، وتقدرون تروحون مكان ثاني تابع لنا فيه أشياء حلوة للأطفال ومجاناً ودلوني المكان ورحنا له وكان فيه أشياء علمية عن المرور والسياقة، وكان في جم لعبة الكترونية 3 سيارات و2 موتور سيكل وجل لعبة ذهنية والمكان كان حلو وايد حلو للأطفال وللكبار، ولعبوا الأطفال لين ما أشبعوا وبعدها طلعنا نتسوق في المجمع ورحنا شرينا فساتين لبنتي شوق للمناسبات والعيد، وتقريباً على الساعة (7:00) جفت الأطفال خلاص تعبوا وبدوا يتمللون، قلت لهم خلاص الحين إن شاء الله نرجع الفندق، وبعدها طلعنا من المجمع ورحنا إلى الفندق وكانت بوابة المجمع تقريباً مقابلة للفندق ومشينا دقيقتين وإلا أحنا في الفندق.

رحت للأستقبال وقلت له الغرفة أجهزت، قالي إي نعم الغرفة جاهزة ولكن أحنا من عندنا عملنا لك ترقية من شقة غرفة نوم واحدة إلى شقة من غرفتين نوم، قلت له مشكورين وما قصرتوا، قالي الشقة في الدور السابع، ووقعت على بعض الأوراق وأخذ من عندي مبلغ (200 دولار) تأمين واستلمت بطاقة الشقة ورحت إلى الشقة.

وأول ما دخلت الشقة أنصدمت من حجم الشقة، كانت كبيرة جداً الصالة كبيرة والغرف أيضاً كبيرة المطبخ فيه جميع الحاجيات، وكان في كل غرفة تلفزيون وفي الصالة تلفزيون كبير ودي في دي، المهم رتبنا أغراضنا واستحمينا وقمت آنه ونزلت إلى البقالة كانت عند بوابة الفندق واشتريت روتي وماي وعصائر وحلويات للأطفال وكاكو وصعدت إلى الغرفة، وكانت في ماكينة التوست قلت اليوم عشانا روتي توست مع جبن ويوم فتحت الروتي إلى طلع الروتي على زبيب وسكر، ورجعت مرة ثانية إلى البقالة وكان الروتي اللي عندهم كله على زبده الفول أو على الشكولاته، ما حصلنا إلى روتي واحد سادة، أخذته ورجعت إلى الشقة وسوينا العشاء للأطفال وبعدها أكلنا أحنا وعلى الساعة (10:00) نمنا لأن ورانا رحلة متعبة يوم ثاني إلى جنتنغ.



هذي مصاريف اليوم الرابع



@@ السعيد @@ غير متصل   رد مع اقتباس
قديم 12-10-2017, 06:35 PM   #8 (permalink)
@@ السعيد @@
أمير الرومانسية
 
الصورة الرمزية @@ السعيد @@


فندق أسكوت كوالالمبور




يوفر أسكوت كوالالمبور شققًا فندقية فاخرة مع خدمة الإنترنت المجانية، ويقع بجوار البرجين التوأم، ويقع في حي الأعمال المركزي، على بُعد (10) دقائق سيرًا على الأقدام من محطة مركز تسوق كوالالمبور للقطارات الكهربائية، ويبعد مطار كوالالمبور الدولي مسافة (60) دقيقة بالسيارة.

تضم الاستوديوهات والشقق في أسكوت مطابخ مزودة بغسالة أطباق وأفران وميكروويف، كما تتوفر أدوات المطبخ كاملة، وتم تجهيز كل سكن بنظام ترفيه منزلي وصناديق ودائع آمنة، كما يحصل ضيوف السكن على امتيازات مواقف مجانية للسيارات، وتشمل المرافق ملعب تنس ومركزًا لرجال الأعمال، كما تتوافر خدمات المساج في سبا Kamboja، وتتوفر خدمات مجالسة الأطفال عند الطلب. ويضم مرافق سبا، ويتوفر جيم ومسبح لاستخدام الضيوف، كما ويقدم مطعم Tujo مجموعة متنوعة من المأكولات الغربية والمحلية، كما تتوفر الأطباق العالمية.












































































@@ السعيد @@ غير متصل   رد مع اقتباس
قديم 12-10-2017, 06:38 PM   #9 (permalink)
@@ السعيد @@
أمير الرومانسية
 
الصورة الرمزية @@ السعيد @@




























































والحين نبدأ بصور كاميرا القوبرو




























مميزات الفندق :

1. الفندق رائع ومجدد من فترة بسيطة
2. وقوعة في الوسط بين شارع العرب وبين البرجين
3. كبر حجم الشقة (الصالة وغرف النوم)
4. وجود التكاسي بالقرب من بوابة الفندق
5. وجود بقالة في الفندق
6. وجود فرن الطبخ والميكروويف وآلة التوست وآلة صنع القهوة نسبيريسو مع الكبسولات
7. وجود جميع أدوات الطبخ وجميع الأواني
8. سعة حجم أعزكم الله الحمامات



عيوب الفندق :

1. عدم وجود عازل الصوت، أنا في الطابق السابع وكأني نايم في الشارع من صوت السيارات نصيحة اللي بيسكن في الفندق يختار أعلى الطوابق
2. الفطور أقل من عادي وغير متجدد نفس ما أهو كل يوم
3. يعطون العميل بطاقة وحدة فقط، وهي لفتح الشقة وبعدها تضعها للكهرباء لتعمل وإذا نزلت لوحدك إلى البقالة تتوهق ما تقدر ترجع شقتك لأن المصاعد تعمل بالبطاقة
4. قلة العاملين في الفندق، ولكن كل واحد قايم ب على أكمل وجهة ما تحس أن في نقص، وما يتأخرون عليك بشيء



أنواع الشقق الموجودة في فندق أسكوت كوالالمبور

1. استديو بريميير
2. شقة ديلوكس بغرفة نوم واحدة
3. شقة تنفيذية بغرفة نوم واحدة
4. شقة ديلوكس بغرفتين نوم
5. شقة تنفيذية بغرفتين نوم
6. شقة بريميير بغرفتي نوم
7. شقة ديلوكس بثلاث غرف نوم
8. شقة بريميير بثلاث غرف نوم

والغرف بين الديلوكس والتنفيذية هو في الطوابق، الديلوكس في الطوبق السفلية والتنفيذية في الطوابق العلوية




@@ السعيد @@ غير متصل   رد مع اقتباس
قديم 12-10-2017, 06:43 PM   #10 (permalink)
@@ السعيد @@
أمير الرومانسية
 
الصورة الرمزية @@ السعيد @@


اليوم الخامس
(24 مايو 2015)



قعدنا الساعة (7:00) صباحاً طبعاً قعدنا هاليوم من وقت لأن ورانا رحله طويلة إلى جنتنغ، المهم تجهزنا ونزلنا إلى الفطور وبصراحة كان فرق بين فطور الصنواي لاجون وبين فندق أسكوت كان فطورهم بسيط جداً وكل يوم نفس الأصناف ما تتغير، المهم أكلنا الفطور وطلعت أطلب تاكسي، كلمت الموظف اللي يقعد برع وقلت له أبي تاكسي أبي أروح إلى جنتنغ طلب لي الموظف تاكسي أزرق وقالي أنت تفاهم معاه وملاحظة أن جميع التكاسي اللي توقف عند الفندق هي اللي باللون الأزرق، رحت لسائق التاكسي وقلت له بجم تودينا جنتنغ وتنتظرنا وترجعنا قالي (300) رينغت، قلت له وايد آخر كم، قالي بوديك جنتنغ وبوديك حديقة الفراولة وحديقة النحل وبعد قالي بيوديني جم مكان قلت له (250) رينغت أوكي، قالي ما يصير شوي، قلت يالله نتوكل على الله، قالي أوكي مو مشكلة، وناديت الأهل وركبنا التاكسي وقالي بعد ساعة بنوصل، قلت له شنو أسمه، قالي أسمي حفيظ، وكان السائق شاب هادئ وما يتكلم وايد وحليو وكان كل يبي يساعد بس مشكلته أنه ما يتكلم عربي ولغته الإنجليزية شوية ضعيفة.


المهم بعد تقريباً (45) دقيقة وصلنا إلى حديقة الفراولة ونزلنا ونزل معانا السايق وراح سأل الكاونتر عن التذاكر، وقالي أن قبل كان الدخول مجاناً والحين سوو الدخول بفلوس ورحت للكاونتر لأن ودفعت (26) رينغت للدخول (8) رينغت للكبار و (5) رينغت للصغار، ودخلنا مزرعة الفراولة وتمشينا في الممرات بين شجيرات الفراولة وكانت أشكال الفراولة رائعة جداً وكانت المزرعة كبيرة جداً، وكان في وسط المزرعة محل يبيع منتجات الفراولة وأشترينا من عندهم مربى الفراولة وحلاوة الفراولة وفراولة فرش، وكان عندهم بعد إذا تبي أنت شخصياً تقطف الفراولة تدفع مبلغ ويعطونة سلة، بس أحنا ما رحنا لأن كنا نبي نستغل وقتنا ونخليه كله في جنتنغ، وهذي صور لحديقة الفراولة










وهذي صورة لبعض النحل المجفف




وبعدها مشينا ورحنا إلى طيور المتو والنايجل وكانوا أكثر من نوع وقالوا لي صوروا مع الطيور بـ (20) رينغت، قالوا الأطفال يبون قلنا يالله، حطوا واحد فوق راسي واثنين على كتفي واثنين على يديني وواحد على يد راشد وواحد على يد شوق وصورنا وكانت الصورة وايد حلوة، وهذي صور الطيور الصورنا معاهم


















وبعدها مشينا على أساس نبي نطلع من المزرعة ولكن المزرعة كانت مثل المتاهة تلف فيك لف علشان تطلع تمر على سوق وبعدها تمر على مزرعة الفطر وبعدها تمر على مزرعة الزهور وبعدها بعد تمر على سوق وبعدها تطلع، كأنها متاهة برنامج الحصن هههههههه، وبعد ما طلعنا لقينا السائق ينطرنا في الخارج.

ركبنا مرة ثانية السيارة و اتجهة فينا إلى محطة التلفريك، ووقف سيارته ونزلنا وساعدنا في شراء التذاكر وصورنا داخل مبنى التلفريك وبعدها قالي آنه راح أنتظركم لين ما ترجعون قلت له أوكي، ورحنا إلى التلفريك وما كان فيه زحمه وايد، لأنه كان يوم الأحد وأتوقعت أن راح نحصل زحمة كبيرة، لكن الحمدلله ما نطرنا سيدة ركبنا التلفريك وكان حدة روعة بس اللي خرب علينا كانت معانا عائلة هندية وكانوا طول الوقت يتكلمون وايقرقرون وبصوت عالي ومتخرعين وكانوا وايد مزعجين، وهذي للتفريك وأحنا صاعدين للأعلى





















































@@ السعيد @@ غير متصل   رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are معطلة


المواضيع المتشابهه
الموضوع كاتب الموضوع المنتدى مشاركات آخر مشاركة
رحلتي الخامسة الى ماليزيا 2008 @@ السعيد @@ سياحة اسيا و فنادق اسيا و عروض سفر اسيا 6 11-14-2017 06:55 PM
رحلتي الى ماليزيا ( ام محمد ) عدسة أعضاء عالم الرومانسية 71 12-14-2013 05:56 PM
عروض ماليزيا , شهر عسل ماليزيا , سياحة ماليزيا amjadjobs سياحة اسيا و فنادق اسيا و عروض سفر اسيا 3 07-29-2011 10:14 PM

الساعة الآن 09:41 AM


Powered by vBulletin® Copyright ©2000 - 2019, Jelsoft Enterprises Ltd. TranZ By Almuhajir
Search Engine Friendly URLs by vBSEO 3.6.0
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103