تصفح

سبحان الله وبحمده عدد خلقه ورضى نفسه وزنة عرشه ومداد كلماته ( ثلاثة مرات ) .

سبحان الله وبحمده سبحان الله العظيم ( 10 مرات ) كلمتان حبيبتان الى الرحمن وثقيلتان في الميزان




العودة   منتديات عالم الرومانسية > سياحية - سياحة وسفر > رحلات سياحية و حجز فنادق و عروض سياحية > سياحة اسيا و فنادق اسيا و عروض سفر اسيا

سياحة اسيا و فنادق اسيا و عروض سفر اسيا سياحة اسيا و فنادق اسيا و عروض سفر اسيا

رحلتي لكوريا الجنوبيه سنــــ2013 ـــة (( سيئول ))

إضافة رد
 
أدوات الموضوع انواع عرض الموضوع
قديم 11-08-2017, 04:57 PM   #1 (permalink)
@@ السعيد @@
أمير الرومانسية
 
الصورة الرمزية @@ السعيد @@
رحلتي لكوريا الجنوبيه سنــــ2013 ـــة (( سيئول ))




رحلتي لكوريا الجنوبيه سنــــ2013 ـــة (( سيئول ))




مقدمه
رحلتي لكوريا الجنوبيه سنــــ2013 ـــة (( سيئول ))


نحن كلنا نعرف انه فيه اختلاف في الاذواق

واللي يعجبني يمكن مايعجب غيري والعكس صحيح


واكيد انا تقييمي أو حكمي ع اي بلد يرجع لخبرتي في سفراتي الكثيره حول العالم (( قولوا ماشاءالله ))

صحيح كل بلد تختلف عن الثانيه من كل النواحي بس

تظل في امور ممكن تخليك تحب هاي البلد ولا ماتحبها


ع العموم هاي المقدمه عشان أوضح وجهة نظري لما تعرفون انه كوريا الجنوبيه وبالذات سيئول

انها ماعجبتني


ومن خلال تقريري بروحكم بتلمسون بعض السلبيات اللي ماريحتني في هاي البلد

وفي نهاية التقرير ان شاءالله بعطيكم

كل السلبيات والايجابيات اللي لمستها في هاي البلد من خلال وجهة نظري


وحتى لو اختلف عليها البعض


رحلتي لكوريا الجنوبيه سنــــ2013 ـــة (( سيئول ))



تفاصيل رحلتنا
رحلتي لكوريا الجنوبيه سنــــ2013 ـــة (( سيئول ))


أعضاء الرحله ...

أنا وزوجي ووبناتي (( كوكي وتوتو ))

وولدي عبادي الملقب سابقا بدودي عاد كبر الحين

الله يحفظهم ويخليهم لي


رحلتي لكوريا الجنوبيه سنــــ2013 ـــة (( سيئول ))


تاريخ السفر ..

من تاريخ 10 / 10 / 2013

الى

18 / 10 / 2013

وهذا اليوم يوم ميلاد عبادي الله يحفظه

مدة الرحله ، بس اسبوع


رحلتي لكوريا الجنوبيه سنــــ2013 ـــة (( سيئول ))


الطيران المعتمد ...


رحلتي لكوريا الجنوبيه سنــــ2013 ـــة (( سيئول ))


ع الدرجه السياحيه رحلتي لكوريا الجنوبيه سنــــ2013 ـــة (( سيئول ))

ماحصلنا ابدا ع البزنس لافي السيره ولا في الرده وكان مسكر من شهرين

قيمة التذكره وقتها = 4775 للكبير

وما أذكر كم تذكرة عبادي

وعقب ارتفعت الاسعار مثل ماتوقعت

وأحلى شي انه سافرنا ع الايرباص 380 في السيره والرده


وقت الاقلاع ...

في السيره كانت رحلتنا ع الساعه 3.30 دقيقه فليل

بس عقب تأخرت ساعه عن الاقلاع ووصلنا متأخريت ساعه

والوصول المفروض يكون 4.40 لسيئول العصر قبل لانتأخر


أما في الرده كانت رحلتنا ع الساعه 11.55دقيقه فليل من سيئول

والوصول لدبي الساعه 4.25 الفجر


مدة الطيران..

7 ساعات ونص تقريبا في السيره

وفي الرده 10 ساعات تقريبا رحلتي لكوريا الجنوبيه سنــــ2013 ـــة (( سيئول ))


رحلتي لكوريا الجنوبيه سنــــ2013 ـــة (( سيئول ))


السكن ...

عن طريق موقع بوكينج اخترنا السكن في فندق

Fraser Place Namdaemun


نوع الغرف ..

عدد 2 بريمير دبل روم

Premier Double Room

وهم عباره عن غرف كبيره فيها قسم للنوم وصاله وبانتري يعني سويت

قيمة السويتين مدة اسبوع = 10 الاف درهم بدون افطار

وهناك عطونا افطار مجاني لشخص واحد في كل غرفه

السعر جدا مناسب وانا اشوفه رخيص ع موقع الفندق وكل شي حلو شفناه في الفندق

أنصح فيه بس ترا فيه كم فندق بنفس الاسم والفرق في المنطقه

ونحن كنا في Namdaemun

اعتقد في واحد في منطقة انسادونج وهذاك نظام شقق واكثر الخليجين يسكنون فيه

واعتقد بعد فيه واحد ثالث بس ممتأكده

المهم تأكدوا من الاسم اذا بغيتوا تسكنون فيه

عقب بعطيكم تفاصيل اكثر عن الفندق من خلال الاحداث اليوميه




معلومات أكثر

عن موقع فندقنا وعنه من خلال هاي الصور ...



رحلتي لكوريا الجنوبيه سنــــ2013 ـــة (( سيئول ))





رحلتي لكوريا الجنوبيه سنــــ2013 ـــة (( سيئول ))





رحلتي لكوريا الجنوبيه سنــــ2013 ـــة (( سيئول ))



رحلتي لكوريا الجنوبيه سنــــ2013 ـــة (( سيئول ))


المواصلات ...

نحن اعتمدنا ع التكاسي

ومره وحده استخدمنا القطار وندمنا وعقب بتعرفون ليش


رحلتي لكوريا الجنوبيه سنــــ2013 ـــة (( سيئول ))


التصريف ...


رحلتي لكوريا الجنوبيه سنــــ2013 ـــة (( سيئول ))


صرفت جزء هنيه بعملتهم ، وجزء خذيت دولارات وصرفتهم هناك

وسعر التصريف يختلف

في الامارات طلع الدرهم الواحد = 263 وون كوري وحد (KRW)
يوم صرفنا طلع وايد بالملايين ، لكن مافيها بركه بسرعه تخلص رحلتي لكوريا الجنوبيه سنــــ2013 ـــة (( سيئول ))


رحلتي لكوريا الجنوبيه سنــــ2013 ـــة (( سيئول ))


حالة الجو ...

في الوقت اللي سافرنا فيه كان خريف والجو كان جميل

أحيانا بروده زياده وأحيانا معتدل بس بصوره عامه كان حلو

واغلب الايام كانت مشمسه للاسف ومره وحده طاح مطر


شو بعد ياهداوه رحلتي لكوريا الجنوبيه سنــــ2013 ـــة (( سيئول ))

ايوه تذكرت

المعلومات اللي جمعتها قبل السفر واللي شجعتني وخلتني اتحمس لهاي البلد

واشوفها وايد جميله قبل لا اشوفها

عاد هاي المعلومات بخليها في الجزء الياي عشان ابا أضيف عليها معلومات من عندي

وعقبها بندخل في الاحداث اليوميه ...



@@ السعيد @@ غير متصل   رد مع اقتباس
قديم 11-08-2017, 04:59 PM   #2 (permalink)
@@ السعيد @@
أمير الرومانسية
 
الصورة الرمزية @@ السعيد @@

مقدمه



اول شي ..

خلوني اخبركم عن جزء اليوم


المفروض اني انزللكم المعلومات اللي جمعتها

وللاسف طلع عندي ملف مضروب وماطاع يفتح


شكله فيه فيروس والقهر انه أهم ملف اللي فيه كل الاماكن السياحيه في كوريا

من خلال اللي جمعتهم من التقارير اللي قريتها


وعشان ما ابا أحطلكم أي شي ، وعشان ما احتر وانقهر ، قررت

اني اعطيكم اليوم تفاصيل رحلتنا اليوميه

وبخلي هاي المعلومات في آخر التقرير

لين أقدر أودي لابي المصلح وأخليه يرجعلي الملف


ثانيا ...

قبل لا أسافر ومن خلال ماقريت عن كوريا من التقارير خذيت عنها فكره

انها جدا جدا جميله وراقيه ومتطوره
وخاصه سيئول

ولما وصلت اول يوم تفاجأت اني ماشفت اللي قريته وشفتها عاديه وبالعكس


في دول آسيويه أحلى وأرقى عنها شرات سنغافوره

ان شاءالله تفاصيل أكثر بتعرفونها من خلال التقرير

وع فكره انا سايره سيئول وانا عارفه اني بزور مدينه ومب مكان فيه طبيعه وجبال وبحيرات

وع هالاساس أعطيكم انطباعي

يالا تعالوا ويايي وعيشوا معاي ...



أحداث اليوم الأول

يوم المغادره




طلعنا من البيت الساعه 12 ونص بالليل وطيارتنا المفروض تطير الساعه 3 ونص

ولانه نحن عندنا البطاقه الذهبيه والفضيه من سكاي وورد قدرنا نسوي الشيك ان من صوب صالة البزنس

وقدرنا بعد ندخل اللاونج الخاص بدرجة رجال الأعمال

تمت اجراءاتنا بسرعه وسرنا نتعشى في اللاونج ونحن يالسين هناك سمعنا اعلان

انه الطياره بتتأخر وبتطير 4 وربع


والعيال خلاص منهارين يبون يرقدون

وموجود في درجة رجال الاعمال اسبا

قلت في خاطري خليني أسويلي مساج قبل لا اركب الطياره

ورايي درب وبكون ع السياحيه وأختكم متعوده ع البزنس


ودخلت سويت مساج لظهري مدة 25 دقيقه

ويوم طلعت أشوف بوعيسى والعيال واقفين برع يتريوني وانا مدوخه من المساج


ويقولولي : يالا تأخرنا

ونسير بسرعه صوب الجيت مالنا وكنا آخر الناس اللي واصله

زين ماطارت الطياره وانا حضرتي اسوي مساج

ركبنا الطياره وانصدمت انه الطياره شبه متروسه وأغلبهم كوريين

حشا من وين طلعوا

وزعت ع عيالي مخدات اللي تشبه حرف U وهاي دايما آخذها للرحلات الطويله وع طول رقدوا




موقف حلو صارلي



وانا يالسه ع كرسيي وبغيت اسدحه شوي مارضى ينسدح مثل كرسي ولدي

خبرت المظيفه عن الكرسي وقالت يمكن خربان ما اقدر أسويلج شي

قلتلها كيف يعني ؟

قالت اذا تبين بغير مكانج وبشوفلج اذا فيه كرسي فاضي

قلتلها : انا ما أقدر اسير ايلس بين الناس بعيد عن عائلتي

يلست وانا متضايقه واقول شو هالنحاسه

لابزنس ولا كرسي اروم اسدحه

وكل المظيفين كوريين ماعدا واحد مظيف مواطن

ولما يا صوبنا أقوله ..

كرسيي مب راضي ينسدح


قالي خوزي ، وسدحه لي

وشويه واتيني المظيفه الكوريه ، أثاري وحليلها أنا كاسره خاطرها

قالتلي

عندنا ورا 3 كراسي فاضيه وهاي حق استراحتنا


انا ممكن أخليج تنامين ساعه وعقب بوعيج ترجعين مكانج عشان نحن نرتاح

قلتلها موافقه وماخبرتها انه المظيف سدح كرسيي

وبوعيسى يقوللي عقب ساعه بتوعيج احسن لاتسيرين عشان ماتخرب ارقادج

قلتله برايه ساعه أمدد ظهري أحسن من لاشي

ويوم سرت ورا شفت الكوريات ماخذات صفين من الكراسي وكل صف فيه 3 كراسي وعازلينه بالستاره حق استراحتهم

قلت في خاطري مب هينات بعد هالكوريات


بس الغريبه أول مره أشوف جذي في طياره

عاد اختكم ماقصرت

شليت الحواجز اللي بين الكراسي واسدح عمري ورا الستار وأرقد هاذيج الرقده


قلت الحمدالله ماخسرت ع البزنس

وعقب نشيت من النوم أحس اني طولت وهي ماوعتني

قلت خلني اسير عند ريلي وعيالي الحمدالله ريحت شوي

ويوم رديت لقيت عبادي سادح عمره ع كرسيين منهم كرسيي

قلت فديته مابخرب ع ولدي وبرد ورا وبكمل ارقادي


ورقدت رقدت الاموات ومانشيت الا قبل لاتنزل الطياره بنص ساعه

بس السلبيه الوحيده في مكاني انه عزكم الله الحمامات ورايي وانزعجت شوي من فتح وتسكير الابواب

احمدي ربج بعد تتشرطين

الظاهر انه المظيفات ماحصلن وقت يرتاحن عشان جذي ماغثوني


وااااايد مهم



لما كنا في الطياره عطونا 3 أوراق نعبيهم

وبوعيسى رقد وماعباهم واضطرينا في المطار نعبيهم وتأخرنا عن الناس


فهاي نقطه وايد مهمه

عبوهم كلهم في الطياره وكلهم بتحتاجولهم


نكمل معاكم أحداث هذا اليوم



وصلنا بعد 7 ساعات ونص طيران

















وكانت الساعه وقت وصولنا







ومشينا ورا الناس لين الكاونترات







وطلعت هاي الكاونترات ماتحتاج الجوازات انما تاخذ ورقه من الاوراق اللي عبيتوها

وقفنا نعبي الاوراق مع بعض الناس اللي ماعبتهم شراتنا

وتأخرنا وروحوا عنا وظلينا آخر الناس






ويانا مال الأمن وقال يلا بسرعه


وعقب عبرنا بعد ماخذوا ورقه لونها أصفر

وسامحوني ماصورت الاوحده من الثلاث أوراق

عقب ماعدينا هاي الكاونترات تبعنا علامة استلام الشنط ونزلنا تحت بالسلم الكهربائي











ولكن شفنا الناس تركب قطار












وركبنا معاهم وشفنا كاونتر ثاني لختم الجوازات


وهنيه لازم نعطيهم ورقه ثانيه

ونفس السالفه وقفنا نعبي الأوراق


وهاي صورتها ، واعتقد يمكن هاي الفيزا






عقب ماعبينا كل البيانات خذونا واحد واحد عند الكاونتر وصورونا بالكاميرا اللي حاطنها عداله

وبعد خذوا بصمة الأصبع

كأنه بشاكير يصورنها ويبصمونا


وعقب خبرونا انه لازم عند خروجنا من المطار نعطي ريال الأمن الورقه الثالثه واللي عبيناها ويا هاي الورقه

وعقب نزلنا تحت عشان نستلم شنطنا

ولأنه نحن آخر الناس والجميع خذا شنطه


لقينا شنطنا ساحبينهم من على السير ومنزلينهم ع الأرض

قلنا زين والله ماتعبونا نسحبهم

وعند خروجنا سلمناهم الورقه الاخيره

وطلعنا نبا نطلع برع ندور تكاسي المطار


انطباعي عن مطارهم



المطار نظيف ومرتب ومنظم ومتطور

وتعاملهم جدا راقي وبشوشين

وماشفنا الاجراءات الامنيه اللي نشوفها في مطارات العالم ، تحسهم مب خايفين من شي

والاجراءات مشت بكل سهوله ويسر




الغلطه اللي أباكم تنتبهون عليها



لاتغلطون غلطتنا

ونحن طالعين بعدنا ماطلعنا برع يانا واحد وقال تبون تكسي

قلناه أوكي : بكم

قال ع العداد

انا هاي الحركه أعرفها واتحذر منها وما آخذ أي واحد يقول تكسي

الا التاكسي الرسميه واللي تكون واقفه برع عند كل مطارات العالم



ولكن يوم قال ع العداد صدقته وقلت هذا مابيقص علينا

وهو ماقص علينا ولكن هو تكسي يتبع التكسي الاسود

وهالنوع اغلى التكاسي في كوريا


والصراحه السياره ممتازه بس مب كبيره

ولكن كفت كل شنطنا

والسايق يعرف انجليزي وجدا رآئع ويلس وايد يعطينا معلومات ويعلمنا بعض الكلمات الكوريه

ولكن للاسف طلع علينا غالي بـ 150 الف وون كوري


تقريبا 500 درهم أو أقل ما أدري بصراحه كم بالضبط لأنه عملتهم صعب نحسبها

وفي العوده أجرنا سياره فان أم 7 راكب وكبيره وفنانه بـ 90 الف عن طريق الفندق

جربوا انكم تسألون الفندق اذا بيرسللكم سياره وبكم بيكون سعرها

يمكن أرخص وأفضل من انكم تدورون ع التكسي المناسب

واذا ماقدروا أو ماناسبكم عن طريق الفندق في هاي الحاله

خذوا تكاسي المطار اللي صافه برع المهم ماتكون السودا



ملاحظه مهمه جدا



لازم تاخذون معاكم عنوان الفندق بالكوري وتطبعونه قبل لاتسافرون

عشان تراوون راعي التكسي


وايد منهم مايعرفون انجليزي ، يعني انته وحظك


معلومات عرفتها

قبل لا أسافر من الاعضاء عن التكاسي في كوريا الجنوبيه


أنواع التكاسي



Regular Taxi

وهو من التكاسي العادية

ويبدأ العداد من 1600 ون لأول 2 كيلو متر

ثم يبدأ بالتزايد ويمتاز بلونه الأبيض " التكاسي جدا نظيفة "

سعر التكاسي من المطار إلى المدينة بحدود الـ 45000 ألف ون


Deluxe Taxi


وهو من التكاسي الفخمة ويبدأ العداد من 4000 ون لأول 3 كيلو


يمتاز بلونه الأسود والأصفر وبمساحته الواسعة من الداخل ونظافته

سعر التكاسي من المطار إلى المدينة بحدود الـ 70000 ألف ون



شوفوا الفرق بين هاي المعلومه وبين اللي دفعناه

والواقع اللي شفناه


انه التكاسي السودا فعلا يبدأ العداد من 4000 وون كوري

والتكاسي الثانيه الملونه غير الأسود يبدأ العداد من

2200 وون كوري

وعقب كم يوم لاحظنا انه التعرفه زادت من 2200 الى 2800 وون كوري

واذا ركبنا التكسي من عقب المغرب ندفع فوق قيمة العداد 600 وون كوري اضافيه

وهذا متفق عليه وحتى في بعض التكاسي ورقه موضح فيها هذا الموضوع

وأحيانا هم يخبرونك قبل لاتركب وياهم خصوصا اذا السواق يعرف انجليزي
@@ السعيد @@ غير متصل   رد مع اقتباس
قديم 11-08-2017, 05:15 PM   #3 (permalink)
@@ السعيد @@
أمير الرومانسية
 
الصورة الرمزية @@ السعيد @@
نتابع معاكم أحداث يوم وصولنا..

لسيئول




أحداث هذا اليوم



طلعنا من المطار متجهين للفندقنا وكانت درجة الحراره





ونسيت كم خذينا من الوقت لين وصلنا

أول ماوصلنا سوينا الشيك ان وكنا تعبانين

بس قلنا بنريح شوي وبنطلع نستكشف المنطقه


وبنتعشى وبنرجع بدري نرتاح ونرتب أغراضنا

مثل ماخبرتكم قبل انه عجبنا فندقنا وكان اختيار موفق


صور سويتاتنا


أول مادخلنا السويتات فرحنا انه حجمهم كبير وفيهم كل شي

وكانوا جنب بعض سويتنا وسويت العيال وكاهم متشابهين



















قسم الشاي وتحته الميكرويف






جهة النوم







التسريحه والتلفزيون في غرفة النوم







وهنيه التلفزيون اللي صوب الصاله






الصالهه وقسم البانتري






قسم البانتري وفيه فرن وثلاجه وبعض اواني الطبخ

عاد القهر هاي اول مره أسافر لبلد وخصوصا مع العايله وما اشل أبدا أي أكل ولامعلبات ولاشي

وندمت أشد الندم

في الأجزاء اليايه بتعرفون كيف عانينا من الاكل ورغم انه الاعضاء نبهوا ع موضوع الاكل

ووصونا انه ناخذ معانا معلبات وغيره ، بس انا ما صدقت

فلت بلد كبيره ومتطوره أكيد بحصل في مطاعمها اللي ممكن يناسبنا غير اللحوم والدجاج

ولكن صدق صدق تعبنا من هالموضوع

ان شاءالله بتشوفون هالشي في الاجزاء اليايه








جهة الجلسه ، وهاي الكنبه ممكن تتحول سرير







وفي سويت العيال حولنا الكنبه لسرير حق عبادي







هذا الحاجز بين الصاله وغرفة النوم

وهو عباره عن باب سلايدنج






من الاشياء اللي موفرينها لنا











هذا جهاز التوست والجدر الكهربائي

ياسلام لو يبت العيش وبهاراتي والمعلبات

جان سويت أحلى الاطباق







الحمام ونتوا بكرامه












طبعا كان في الحمام فنتك من فناتك الكوريين


عاد انتوا بروحكم حاولوا تعرفون استخدامات هالجهاز الخاص بالمرحاض

عزكم الله





هذا الاكل الوحيد اللي يبته ويايي لكوريا

وهو شوكولا سويسريه كان جايبنها معاه بوعيسى من سويسرا






المنظر الخارجي من شباك غرفتنا

منظر ليلي





الصراحه مصوره صور أكثر للمنظر الليلي بس للاسف اغلبهم عاكسه صورتي

في الزجاج أو التصوير يكون مب حلو

واعتقد التصوير النهاري أفضل ويبين المناظر أفضل


















@@ السعيد @@ غير متصل   رد مع اقتباس
قديم 11-08-2017, 05:17 PM   #4 (permalink)
@@ السعيد @@
أمير الرومانسية
 
الصورة الرمزية @@ السعيد @@
جولتنا الأولى في شوارع كوريا



بعد ماريحنا شويه في غرفنا ،كنا حاسين انه نشيطين ومتشوقين نمشي في شوارع كوريا

وفي نفس الوقت كنا نبا نطلع نتعشى

نزلنا وسألنا الرسبشن عن مكان الحياه ووين الاسواق والمطاعم

خبرونا انه قريب وقالوا من تطلعون من الفندق خذوا يسار

وعند نهاية الطريج لفوا يسار وامشوا ع طول وبتشوفون الحياه جدامكم

عاد نحن طلعنا ولما وصلنا لنهاية الطريج

استوى الخلاف العائلي الأول

أنا أقولهم لفوا يسار

وبوعيسى والعيال يقولون لا بعد مانقطع الشارع نلف في الشارع الياي

مشيت ورا شورهم ، شككوني في نفسي


بعد ماقطعنا الشارع كان جدامنا شارعين هنيه احترنا أي شارع ناخذ

قلت ماشي الا اسأل الاكوريين

سمعت عنهم انه شعب مبتسم وحبوب ويساعد ولو حتى البعض منهم مايعرف انجليزي



وشفت بنت مودرن تمشي تقربت منها واقولها

لو سمحتي ( طبعا بالانجليزي )

تخيلوا انا أمشي أقولها لوسمحتي وهي مطنشتني وتمشي في طريجها

وأنا الحقها

واقول لو سمحتي لوسمحتي

حسستني كاني طلابه ( يعني شحاته ) تطلب وراها

تفاجأت من ردت فعلها وقلت معقوله تتجاهلني جذي

بعدين قلت في خاطري

مابحكم ع الشعب الكوري عشان هاي

شفت وحده ثانيه

ونفس المشهد يتكرر

لااااا معقوله

شو هاي المعامله الخايسه منهم

وعقب اجتهدنا ومشينا في الشارع اليسار

وهو نفس الجهه اللي اقترحتها بس في الشارع المقابل له

مشينا شوي وووقفنا ، نسيت منو قال من عائلتي

لا الشارع الثاني اللي ورا

تخيلوا

نسير ونرد نفس المكان

وعقب شفت عائله كوريه قلت مافي مجال لازم أحاول بعد

لازم حد يساعدنا مافينا نرجع الفندق

ولافينا طاقه نلفلف وايد بعدها أجسامنا مرهقه

والف لك حمد شكر يارب

وأخيرا عطونا ويه وردوا علينا

وخبرونا انه نكمل لين أخر هالشارع وعقب نقطعه ، ولاحظوا

انه نحن قطعنا الشارع قبل

وقال انتوا بتشوفون بروحكم المولات

ومشينا وصادف انهم مشوا معانا نفس الطريج

وعقب طلع الطريج اللي انا فهمته من موظف الفندق ، هو الصح



ع العموم هاي الجهه يسمون شارعها ميونغ دونغ

وفيها مولات وفنادق وأكشاك

وفيه شارع طويل وله تفرعات وكله محلات ع الجانبين وأكشاك في الوسط


ركزوا ويايه وبشرحلكم أكثر كيف هاي المنطقه


من نطلع من فندقنا ع جهة اليسار نمشي لين آخر الشارع وهي مسافه قصيره

وعقب نلف يسار ونمشي بعد لين آخر الشارع وهو شارع طويل

وهنيه

اذا لفينا يسار بتشوفون كل الاسواق اللي خبرتكم عنها

ولكن لو لفيتوا يمين

وقطعتوا الشارع وكملتوا سيده يعني ع طول بعد هنيه بتشوفون مولات واسواق شعبيه اسمها

نامديمون

وللاسف ماحصلت وقت اكتشف هالجزء رغم انه عدالنا


الحين بعطيكم صور من جولتنا في هاليوم

وفي الاجزاء اليايه بعطيكم صور أكثر لهالجزء





الصور مب واضحه وايد ومب كثيره لأنه كنا نحس بالتعب رغم الحماس اللي فينا

وماكان لي خاطر وايد وانا أصور



















تخبلنا ع هالمول يوم شفناه من برع بس عقب بخبركم سالفته







ونحن نمشي والعالم زحمه ، ندور مطعم بس مانشوف شي مناسب







طبعا الاكشاك اللي تسوي اكلاتهم موجوده بكثره

بس ولامره شفت لحم كلاب مثل ماسمعت



تخيلوا هالاكله جربتها في يوم ثاني

الصراحه اشتهيتها بس ماطلعت لذيذه لأنه الطبقه اللي تحتها كانت حلوه يعني سكريه

والبيضه مالحه عاديه






ونحن نمشي شفت فندق آيبس ( ibis)

وتذكرت انه قريت انه فيه مطعم هندي وأكله حلال

قلت يانا الفرج وأخيرا حصلنا مطعم ممكن ناكل فيه

دخلنا الفندق وسألنا عن الطعم لين حصلنا في الفندق في الدور الأرضي






شفنا في مدخل الفندق دعايه عن مطعم يقدم كباب ودونر

قلنا أكيد مطعم تركي ولكن خبرونا انه كوري ما أدري والله ممتأكده

بس المهم مايصلح لنا






وصلنا المطعم











































































انطباعي عن المطعم

من كل النواحي ممتاز مقارنه بالمطاعم المتوفره

سواء من الديكورات وأكله وخدمته ولكن عيبه انه شويه غالي

تقريبا 550 درهم طلع علينا رغم انه مب طالبين وايد






وعقب ماتعشينا رجعنا ع طول الفندق عشان نرتاح
@@ السعيد @@ غير متصل   رد مع اقتباس
قديم 11-08-2017, 05:19 PM   #5 (permalink)
@@ السعيد @@
أمير الرومانسية
 
الصورة الرمزية @@ السعيد @@

في الجزء اللي طاف نسيت حاجتين أقولها لكم

اول شي

لما رجعنا الفندق عقب ماتعشينا مرينا ع بقالة صغيره تفتح 24 ساعه

وهي قريبه من فندقنا واسمها 7/11 سفن الفن

معروفه في شرق آسيا

لما دخلنا ماشفنا فيها وايد أشياء اشترينا ماي وكاكاو وأشياء بسيطه

من الاشياء اللي ممكن تلاقونها في هاي البقاله

غير الحلويات فيها عصاير وحليب فرش وخبز سلايس وبيض ونودل ومعلبات

بس مافي شي من هالمعلبات تصلح لنا غير التونه

ومافيها ابدا خضرا وفواكه

وهذا تقريبا اللي اذكره بالاضافه الى اشياء ماتصلح لنا

يعني الاختيارات مب كثيره

وهاي البقاله منتشره عندهم وفي منهم كبار ومنهم صغار شرات اللي عدالنا


النقطه الثانيه اللي برمسكم عنها

وهي بطاقة الموبايل

اول ماوصلنا الفندق وبعد ماسوينا الشيك ان سألناهم عن كارت الاي فون اذا عندهم

قالوا ماعندنا وعطونا برشور وقالوا فيه كل المعلومات

ولأنه كنا تعبانين ماقريناه

وقالوا ممكن نأجر عليكم موبايلات وفي اليوم بيكلفكم الموبايل 15 الف وون

ال10 الاف وون كوري دايما بوعيسى يحسبها ع انها 10 دولار

معناته انه الايجار تقريبا بيكون 50 درهم وكسور

شفنا السعر مبالغ فيه ومافي داعي منه

وقلنا بنشوف البرشور وبناخذ العرض المناسب


الحين بندخل ع أحداث اليوم الثاني وشو سوينا فيه





رحلاتنا في اليوم الثاني


أولا منطقة العرب ايتاون




يوم السبت تاريخ 12/ 10

قمنا في هاليوم وايد متأخر الساعه 12 الظهر نتيجة تعب أمس وكان بعد ودنا نرقد زياده

ولين لبسنا وطلعنا استوت الساعه 2 الا ربع

وكانت درجة الحراره





فكرنا أول ندور كوفي نآكل أي شي


وامس شفنا عدال فندقنا كم كوفي شوب ومن ضمنهم ستار بكس

طلعنا من باب الفندق ومشينا في اتجاه اليمين ودخلنا ستار بكس

تفاجأنا انه ماعنده أبدا كرواسونات اللي موجوده ومعروفه في ستار بكس

ولاعنده حتى ساندويشات جبن


وكل الموجود بعض الكيكات وساندويشات فيها لحوم

قلنا خلاص بس بنشرب أي شي وعقب بنسير شارع العرب ايتاون وبنتغدى هناك


ملاحظه مهمه

قبل لاتطلعون من الفندق لأي مكان في مخططكم بتسيروله في هاليوم

لازم تخلون الموظفين اللي في الفندق يكتبون لكم العناوين بالكوري

وقبل مانطلع أنا سويت جذي

بعد ماخلصنا من ستاربكس خذينا تاكسي في منطقة ايتاون







أول مانزلنا التكسي كان عدال فندق هاملتون







شفنا احتفالات في الشارع




























في ويهنا مطعم تركي



أسمه الباشا

















































دخلنا فيه وكان وايد صغير واغلب الناس تاخذ تيك أوي

نحن يلسنا ع الكراسي اللي داخل بعد ماعطيناهم طلبنا












والصراحه كانت ساندويشاته لذيذه ، بس عيب هاي المنطقه انها بعيده عنا


وصعب علينا كل مابغينا نآكل نضرب خط لين هناك

ومن ناحيه ثانيه بعض الاعضاء حذرونا من السيره فليل لهاي المنطقه

ع العموم هذا المطعم أنصح فيه وأكله لذيذ

طلباتنا































نتابع أحداث اليوم

بعد ماخلصنا غدانا سرنا ندور تكسي عشان نحضر المسرحيه وموعدنا ع الساعه 5 العصر

تمينا فتره في الشارع ننتظر تكسي يطوف علينا

كانوا بعض التكاسي تطوف بس ماتوقفلنا

وبعضهم يوقفون ولما يشوفون العنوان يرفضون يودونا

وعقب قطعنا الشارع للصوب الثاني لعلى وعسى نحصل تكسي

ونحن متوترين لأنه الوقت يطوف ونخاف نتأخر


وفي الأخير وقفلنا تكسي ورضى يودينا


صور للشارع ايتاون ونحن نمشي ندور تكسي








































@@ السعيد @@ غير متصل   رد مع اقتباس
قديم 11-08-2017, 05:21 PM   #6 (permalink)
@@ السعيد @@
أمير الرومانسية
 
الصورة الرمزية @@ السعيد @@
ثانيا : مسرح نانتا








في الأخير حصلنا تكسي وبعد شاف العنوان وافق يودينا

والحمدالله كان طيب ويانا


بعض المعالم ونحن في الطريج للمسرح












ووصلنا قريب المسرح


(( ع فكره أي عنوان تعطونهم ياه ع طول يحطونه في النفجيشن ))


وقف في مكان حسب ما الجارمن عطاه

ولكن وقفنا في سكه ومب عارفين وين المسرح بالضبط

ولكن التكسي كان متعاون فقام هو بنفسه يسأل الكوريين اللي يمشون

ويراويهم الورقه اللي عندنا
واللي فيها اسم المسرح

الحمدالله مب نحن اللي سألناهم

فقالنا واحد

هذا هو المسرح وشاور ع مبنى عدال ماوقفنا

شكرناه ونزلنا نركض داخل المسرح وكنا متأخرين 10 دقايق

أول ماراويناهم العنوان من الحجز اللي خذته من النت قالوا اصعدوا فوق وهاتوا التذاكر

ونركض فوق وناخذ التذاكر

وعقب ننزل تحت عند المسرح وهم كانوا يساعدونا ممقصرين

وكنا آخر ناس تدخل المسرح

والحمدالله كان توه بيبدأ العرض


شكل المسرح من برع


























معلومات عن المسرحيه






قريت وايد عن هالعرض المسرحي وقررت انه نزوره


وحجزنا حق ثاني يوم من وصولنا لسيئول

واخترنا توقيت الساعه 5 عشان نرجع بدري ومانتأخر لين بالليل

واخترنا الكراسي الاماميه واعتقد قيمة التذكره للشخص بـ 70 أو 60 الف كوري

الصراحه ممتذكره ، مايعادل 240 درهم أول أقل شوي

طبعا فيه تذاكر أرخص

بس نحن خذينا الأغلى عشان جدام وبغينا في الصف الأول بس طلع كله محجوز

واضطرينا ناخذ ثالث صف

ودفعنا بالفيزا ، وارسلونا الحجز ع الايميل


شو اللي اكتشفناه

أول شي

طلع عندهم مسرح ثاني وموجود في فريجنا ( ميونغ دونغ )






وهاي أوقات عروضهم







ونحن ماكنا نعرف رغم انه موجود في موقعهم

بس البلد يديده علينا وصعب كنا نعرف انه عدالنا


وهذا موقع مسرحنا






أوقات عروضهم






أرقام تلفوناتهم






الشي الثاني

لما دخلنا المسرح ويلسنا في الصف الثالث أكتشفنا انه الصفوف الأولى والثاني فاضيات

يعني هم مفضينه عن قصد وحاطين في موقعهم انه محجوز

وهالشي وايد فرحنا لأنه محد كان يالس جدامنا وعباره كأنه نحن يالسين

أول صف






الشي الثالث

شفنا انه في عرض مسرحي ثاني وكبير ويسون له دعايه

عن حفلة زواج

ولكن للاسف وقتنا ضيق انه نحضره واكتفينا بعرض النانتا


صور من العرض الثاني

















































انطباعي عن المسرحيه

العرض جدا جدا روعه

للاسف كان التصوير ممنوع بس صدق يستاهل

حتى قبل مانسير بوعيسى ماكان متشجع ويقول نحن مابنفهم كوري وليش تحجزين فيه

قلتله هو صامت ويعتمد ع الحركات والغناء والموسيقى

وفعلا كان العرض مفهوم وهم يوضحون اللي يحتاج بالانجليزي

وكان وايد يضحك وممتع وأكثر من رائع

حتى بوعيسى عقب وايد استانس ع اختيارنا

أنصحكم فيه




قصة المسرحيه

هي تحكي عن 4 طباخين لازم يجهزون وليمه في وقت محدد والشيف يرأسهم ويشرف عليهم

وخلال هاي المده كانوا وايد يسوون مواقف ومشاهد غنائيه وفكاهيه ورقصات


صور للمسرح وللمسرحيه





































عبادي فديته لما خذوه معاهم ع المسرح يشارك

كانوا مسوين مثل مسابقه من ولدي مع فريقه وريال ثاني مع الفريق الثاني

والفكره ، انه يجمعون الاطباق اللي يخلصها الطباخ ، والفايز اللي يخلص أطباقه

مافي داعي أقولكم شو سوى ولدي

فضحنا






هنيه لما وقفوا يحيون الجمهور وعبادي معاهم

بس هو في عالم ثاني والريال يمطه صوبهم عشان يتصور

بس ماشي فايده






ههههههههههههههه

ولدي صدق عمره انه طباخ وساير يكمل شغله
































































صور من المسرحيه

























أبطال المسرحيه

ع فكره هاي المسرحيه تقدمها فرقتين كل وحده تقدم عرض واحد

ماينلامون وايد فيها مجهود













نتابع تفاصيل هذا اليوم

بعد المسرحيه يلسنا نتصور ونصور وعقب شفنا كوفي شوب في داخل مبنى المسرح

كنا بنيلس نريح فيه ونحلي

وكان وايد حلو ولذيييييييذ الوافل عندهم
































تيلسنا في الكوفي فتره مبسوطين ومرتاحين وخصوصا كان فيه واي فاي

لاحظتوا

لين الحين ما اشترينا بطاقات للاي فون والصراحه عقب هونا نشتري ولاسألنا

ما أدري أحس ماكان عندنا وقت

وأكتفينا بأرقامنا مال الامارات عند الضروره نتصل في بعض

أو نطرش مسجات عاديه ، واذا حصلنا واي فاي

تواصلنا بالواتس ، وعموما كنا معظم الوقت مع بعض

عقب قررنا ناخذ تكسي ونرجع منطقتنا ونتمشى فيها

@@ السعيد @@ غير متصل   رد مع اقتباس
قديم 11-08-2017, 05:23 PM   #7 (permalink)
@@ السعيد @@
أمير الرومانسية
 
الصورة الرمزية @@ السعيد @@
ثالثا : منطقة ميونغ دونغ




وعقب قررنا ناخذ تكسي ونرجع للمنطقه اللي ورا فندقنا وقلنا بنتمشى فيها ، وبنستكشفها أكثر

أمس كنا تعبانين وماشفناها عدل هاي المنطقه


طبعا غير المولات والمحلات واكشاك البيع

في هاي المنطقه مطاعم متنوعه ومحلات ايس كريم وحلويات

وكوفيهات مثل ستار بكس واحتمال يكون في صيدليات بس ماانتبهت

ولكن ماشفت سوبرماركت واحد وخبروني انه في مول لوتي سوبرماركت كبير

وكان هالمول في جهه ثانيه

والمنطقه كبيره ومتفرعه وشوفوها ويايه بالخريطه


شوفوا اللي معلمه عليه بالقلم


فندق أيبس وكل المنطقه اللي حواليه هي مناطق تسوق






والمنطقه المقابله فندق ايبس كلها مولات







لو مشينا ع امتداد هذا الشارع ، فراح يوصلنا لفندقنا

مسافة ربع ساعه مشي أو أقل

فندقنا هو المبنى اللي عدال أسمي في التوقيع اللي ع الصوره






لو نرجع للجهه الثانيه ع امتداد شارع ميونغ دونغ

تذكرون يوم قلتلكم فيه بعد هناك مولات واسواق شعبيه

شوفوها ع الخريطه

منطقة نامديمون الشعبيه






وجنب هاي المنطقه الشعبيه وايد مولات

زرنا منهم واحد او اثنين






الحين نرجع من صوب فندقنا

لو طلعنا من فندقنا وخذينا يمين ومشينا سيده ع طول

بنشوف هالمعالم السياحيه

المبنى الازرق اسمه سيتي هول

وجدامه ساحه كبيره كل يوم فيها خيم ويعرضون أكل وغيره

وبعد ماحصلنا وقت نتمشى في هالجزء

والمبنى الثاني اللي كأنه بوابه فيها مظله هذا قصر بعد مازرته






نتابع معاكم أحداث هذا اليوم

نزلنا التكسي ويلسنا نتمشى ونتشرى وهنيه لاحظت انه البضائع ماتشجع وايد

بس كنا وايد مرتاحين ومستانسين


جوله في شارع ميونغ دونغ




مالذ وطاب

























المسرح اللي فيه عرض النانتا














































هاي تبيع شوارما بس مب حلال













توا انتبه ع هالمحل للاسف مادخلته



















في الاسواق بتشوفون كثير من المحلات تبيع المكياج

صناعه كوريه ، وعرضهم ومنتجاتهم مغريه

بس ما أدري ليش ماتشجعت وايد واشتريت شويه

وهذا المحل مشهور وشفت منه وايد فروع في أماكن ثانيه

















































اشترينا من عند هاي بسكوت تسويه من الشكر بس ماعيبنا

مارضت أصورها وعصبت عليه

وسرت وصورتها من وراها






واشترينا بعد هالبطاطس بعد ماعجبتنا كلها دهن







انطباعي الأول عن اسواقهم


الصراحه ماعجبتنا بضائعهم وماتشرينا الا شي بسيط

وهذا كان رآيي ورأي البنات

بس حلو التمشي في الشارع


نتابع أحداث اليوم

تمشينا لين استوت الساعه 10 ونص وبدأت المحلات تسكر

وقررنا نتعشى ونرجع الفندق وبدأت مرحلة البحث عن الأكل

ونحن نمشي في هالمكان شفنا ماكدونالد وقلنا بنسير نتعشى فيه

ولما وصلنا عنده سألناهم اذا عندهم ساندويش فيليه سمك أو روبيان

قالوا ماعندنا غير لحم ودياي







طلعنا ندور غيره

وشفنا بورجر كينج ، ونفس الشي ماحصلنا لاسمج ولاروبيان

وعقب شفنا بيتزا هت



















ودخلنا وقالوا انهم سكروا بس حق التيك أوي مفتوح

قلنا حلو

ووقفنا عند الكاشير عشان نطلب ويلسوا العيال يختارون شو يبون ولكن قبل لا ايي دورنا

يتنا الموظفه وقالت حتى التيك أوي بعد سكر رغم انه فيه ناس تنتظر طلبها

قلنالها ع الاقل بيتزا مارغريتا

قالت سكرنا

عاد الله وأعلم صادقه ولاتجذب

عقب مايأسنا انه نحصل شي ناكله قررنا نرجع الفندق وماكان في بالنا شي

ونحن نمشي شفنا سوبرماركت سفن الفن كبير في طريجنا

دخلنا ودعبسنا فيه وماحصلنا شي يبرد قلبنا

وعقب طلعنا وكملنا مشي

وشفنا محل دونت

دخلوا العيال واشتروا من عنده وكان عنده ساندويش جبن وبنتي طلبته بس ماعيبها


أحيانا ممكن نحصل أكل بس لما نتذوقه مايكون طعمه لذيذ أومثل مانتوقعه


كملنا مشي

وهنيه لفينا في الشارع اللي فيه فندقنا في اتجاه ستاربكس






وشفت مطعم ستيك هاوس وشفت انه عنده في المنيو باستا

قلت لو نطلب باستا بالصوص

ولما دخلنا لقيناه مسكر

لاحول شو هاي الحاله

وكملنا مشي وشفنا كوفي باريس وهذا أحلى كوفي جربناه في كوريا

عقب بعطيكم عنه معلومات أكثر وصور

المهم ، دخلنا الكوفي وكان بيسكر وأغلب الساندويشات اللي تناسبنا عنده مخلصه
ولكن المفاجأه الحلوه انه حصلنا عنده جبنة فلاديفيا

خذينا من عنده جبن وخبز سلايس وطلعنا من عنده ع فندقنا اللي كان قريب

أول شي

اتصلنا ع خدمة الغرف عشان نطلب من عندهم أي شي ناكله لو خفايف

قالوا انهم سكروا

وفي الأخير تعشينا خبز سلايس وجبن فلاديفيا وربطنا بطنا ورقدنا



امزح وياكم

الحمدالله عدت ع خير وتراها نعمه وكفتنا

ذكرت أغنيه جديمه لصباح يوم تقول

ع البساطه البساطه

تغدينا جبنه وزيتونه وتعشينا البطاطه




نظره من شباكنا قبل لا اقولكم

تصبحون ع خير




@@ السعيد @@ غير متصل   رد مع اقتباس
قديم 11-08-2017, 05:28 PM   #8 (permalink)
@@ السعيد @@
أمير الرومانسية
 
الصورة الرمزية @@ السعيد @@
يوم الأحد 13/10/2013


اليوم أكثر يوم تعبنا فيه

واليوم اللي ضيعناه ع الفاضي

والجو في هاليوم مشمس وحار







تذكرون لما خبرتكم انه عاطينا لكل غرفه افطار مجاني لشخص واحد

قمنا الصبح وقررنا نتريق في البوفيه ونحن عددنا 5

عبادي مجانا و 2 مجانا من الاساس ، وبندفع بس عن اثنين


وماصورت البوفيه في هاليوم لأنه كان زحمه وماكان في مجال

ولكن سرت في يوم ثاني وصورته


فلما بعطيكم تفاصيل هذاك اليوم بعطيكم صور البوفيه


انطباعي عن بوفيهم


ماعجبنا والاختيارات المناسبه لنا قليله

وكانوا حاطين نوعين من البيض

واحد مسلوق والثاني Scrambled يعني مقطع قطع صغيره

بس أنا طلبت منهم يسوولي بيض مقلي وممانعوا بس ابدا ماعجبني كله زيت

بصوره عامه البوفيه ماياب راسنا





اليوم قررنا نسير نزور بعض القصور الموجوده في كوريا ومشهوره

وهم عندهم مجموعه من القصور

شوفوا هاي الخريطه فيها القصور وأماكن وجودها







أسماء ومعلومات عن هاي القصور








زيارة القصر الأول وأسمه ...














عنوانه








كنت حابه ازور القصر اللي فيه الحديقه الخاصه عشان أشوف أوراق الخريف

لأنه نحن كنا في شهر الخريف


ولما سألتهم في الرسبشن عطوني اسمين من القصور

واخترت هذا لأني فكرته هو اللي فيه الحديقه


مغامراتنا في الأندرجراوند




اليوم فكرنا انه نجرب القطار ونشوف اذا بيعجبنا

وفي الفندق خبرونا أي محطه اللي ننزل فيها عند هالقصر


سرنا المحطه اللي عدال فندقنا

نزلنا في المحطه وشفنا حرمتين واقفات كأنهم يشتغلون في المحطه


قلنا بنسألهم وين نقطع التذاكر

ولما تقربنا عرفنا انهن متطوعات لخدمة الناس ( كانت لفته حلوه منهم ماشفناها في اي بلد )

راويتهم اسم القصر اللي كتبولي ياه في الفندق

وقالتلنا انه نقدر نحجز من المكينه


فقلنالها تعالي ساعدينا

وماقصرت يت ويانا وقطعت لنا التذاكر وطلعت المكينه فيها باللغه الانجليزيه

يعني كنا نقدر نحجز فيها بروحنا


بس عشان اول مره كنا مرتبكين انه مانعرف

الصراحه نسيت كم دفعنا بس كان رخيص


هاي المتطوعه اللي سارت ويانا عند المكاين



















والحلو انه بعد مانخلص من التذاكر نقدر نحطها في جهاز في المحطه ترجعلكم 500 وون عن كل تذكره

كأنه تأمين ورجعناه


هاي هي المكينه اللي رجعنا منها الباقي





ع فكره كل شي عندهم موضح بالانجليزي


وعقب نزلنا ننتظر القطار





خذينا اللاين الأزرق رقم 1 وصعدنا القطار

ولااااااعت جبدنا من ريحتهم




الله يسلمكم لاحظنا انه الكوريين تطلع من حلجهم ريحه خايسه

يعني اذا تقرب حد منهم يكلمكم بتشمون ريحته



ولما ركبنا القطار شمينا القطار كله ريحة حلجهم



وهذا الشي كلنا شميناه يعني مب أنا بس

عبادي بالذات مايحب الروائح الكريهه مايتحملها

ويقوللي

راسي يدور

أبا أزوع ( ارجع )

وتمينا يالسين وكلنا مسكرين خشومنا نتريا متى القطار يوصل


ونزلنا في المحطه الثانيه مباشره

وعقب غيرنا القطار وخذينا اللاينالبرتقالي 3 ونزلنا في ثاني محطه


وأول مانزلنا وطلعنا من المخرج شفنا علامة للقصر

أثاري هذا القصر ندخله من المحطة

اتبعنا العلامات لين طلعنا من داخل القصر


هنيه أول ماطلعنا من المحطه وكنا يايين من تحت الارض وصعدنا السلالم







جزء من القصر







القصر كبيــــــــــر وله عدة أقسام

نحن دخلنا القسم الرئيسي














وفي هذا القسم كان فيه كوفي وأشياء تراثيه من العهد القديم وهو من عدة طوابق



















طبعا هذا غير عن القصر ، وع فكره الدخول مجانا

دخلنا نتمشى ونتفرج

































ولكن انا فكري مشغول في الحديقه


تركتهم وسرت الاستقبال وسألتهم عن الحديقه الخاصه







وقالولي هذا في قصر ثاني


طلبت منهم يكتبولي اسمه بالكوري

وسألتهم كيف نطلع برع عشان نبا ناخذ تكسي


طبعا عقب مالاعت جبدنا من ريحتهم قلنا توبه نركب القطار وبنركب كله

تكاسي حتى لو ندفع أكثر ، المهم انه نشتري راحتنا


ومن غير الريحه الخايسه كان الجو حار تحت في المحطه

ومتعب نزول وطلوع السلالم
@@ السعيد @@ غير متصل   رد مع اقتباس
قديم 11-08-2017, 05:31 PM   #9 (permalink)
@@ السعيد @@
أمير الرومانسية
 
الصورة الرمزية @@ السعيد @@
القصر الثاني اللي فيه الحديقة الخاصه



رجعنا لمحطة القطار اللي دخلتنا ع القصر وخذينا المخرج رقم 6 وطلعنا ع الشارع العام

وخذينا تكسي


وقفنا التكسي وعطيناه عنوان القصر االثاني







وصلنا القصر







قطعلنا بوعيسى تذكره حق القصر







الاسعار ..


الصغير 1500

والكبير 3000


ودخلنا نمشي داخل ، وشفنا علامه لحديقة القصر

ومشينا مسافه لين وصلنا عند البوابه







واكتشفنا انه لازم نقطع تذاكر ثانيه حق الحديقه

وقطعلنا بوعيسى التذاكر ، والرحله هاي لازم تكون مع مرشد







الاسعار


سعر الكبير = 5000

سعر الصغير = 2500



قلتلهم اول ندخل الحديقه وعقب ممكن ندخل القصر

ودخول الحديقه لازم يكون ويامرشد


والحمدالله انه المرشد كان موعده بعد 10 دقايق

وقفنا عند البوابه نسولف مع بعض ونتريا

وأشوف وحده يت وشاله مظله وحسيت انها هي المرشده

ولكن محد نادانا ونحن يالسين في مكانا


وعقب أشوف ناس متجمعه في صوب ثاني من مدخل عدال هالمدخل

قلتلهم خلونا نسير هناك يمكن هناك التجمع

وطلع هو






هذا قروبنا اللي بيدخل ويانا وطلعت هي هاي مرشدتنا

الحمدالله ماتمينا مكانا جان ساروا عنا

طبعا المرشده ترمس بالانجليزي وبطلاقه

ودخلنا معاها ومشينا مسافه وهنيه يلست تراوينا معلم من معالم الحدبقه

ووقفنا هنيه






وكان موجود في هالمكان بقاله صغيره وحمامات عزكم الله


هنيه قالت لنا المرشده :

اللي يبا يدخل الحمام يدخل الحين لأنه بنمشي ساعه ونص


وغلطتنا انه ما اشترينا ماي ولا خذينا أي عصاير ويانا

وبدأت رحلة العذاب





لأنه هلكنا من الحر والمشي والصعدات والنزلات عشان نشوف حديقة هذا الامبراطور

المسترغد اللي يتمتع بكل هاي الرفاهيه


وياريت ع تعبنا هذا شفنا الحديقه حلوه

كانت عاديه أكيد في زمنه كانت روعه بس في الواقع مافيها شي مميز


لا اشجار منسقه ولا ورود جميله ولا انهار أو بحيرات حلوه ولا شي يخليني اقول انها تستحق الزياره

خصوصا اللي مثلي ومايحبون المتاحف والاثار القديمه

عاد أسوأ شي في هاي الزياره اني ماشفت أوراق الخريف الملونه

فسألت المشرفه عنها

قالت عادة في الفتره يكون الجو بارد ومايكون حر مثل اليوم

وممكن ع آخر هالشهر أو بدايه نوفمبر بتتغير أوراق الشجر وبيدخل الخريف



































































مب قادره أتذكر التفاصيل اللي شرحولنا ياها بس اغلب الاماكن في حديقته

يا أما يكون حق التأمل

أو القراءه

او صيد السمك اللي عقب مايصيدهم يعقهم

وهكذا



















وقفتنا عند مدخل مكان معين ، وقالت

انه الاسطوره تقول اذا دخلنا هالمكان وطلعنا منه فهذا الانسان بيعيش ومابيموت او بيطول عمره

ممتذكره بصراحه

المهم نحن مادخلنا لأيمانا انه العمر بيد الله

تمينا واقفين نسولف وياها والناس تدخل وتطلع

الظاهر ماصورت المدخل اللي خبرتنا عنه






هاي غرف الخدم اللي في الحديقه وعرفنا انه خدمهم منفصلين

الرياييل في صوب والحريم في صوب

وكله واحد له باب

ولكن الغريبه انه مسوين الباب واطي عشان لما يدخلون صوب منطقة سكنهم ينحنون




















بعد ماخلصنا جولتنا في الحديقه

واللي حسينا فيها بالتعب والارهاق قررنا مانكمل ومانسير القصر


ونطلع نسير نتغدى في شارع العرب



انطباعي عن القصر



مايستاهل العنوه وما انصح فيه وهذا رأيي

وانتوا اللي يناسبكم



منطقة ايتاون


خذينا تكسي يودينا لمنطقة العرب ايتاون

واخترنا مطعم اسمه مطعم دبي ، ولكن هو عراقي

المطعم جميل في ديكوراته وكبير ولكن أكله تعيس وماعجبنا وما أنصح فيه

أنا وبوعيسى تركنا أطباقنا وماكلناها

والعيال فديتهم من يوعهم كلوا أكلهم

وقالوا لابأس فيه

الا عبادي اللي حب أكلهم وايد


































طلباتنا







أونه هذا برياني

واللحم فيه ريحه







وهذا مندي بس ماعجبنا














والشوربه كانت تعيسه

وفي اطباق مكرره مثل المندي والبرياني الجذاب


وهاي اسعارهم






عقب طلعنا وسرنا عان نسير مطعم الباشا

وفي الطريج شفنا بعد مطعم تركي ثاني







كانوا يبيعون آيس كريم والريال اللي واقف برع ويبيعه كان وايد يسوي

حركات ضحك بالايس الكريم

وقفنا نتفرج عليه والعيال مبسوطين ، واشتروا من عنده













وعقب سرنا عند الباشا وكلينا عنده أنا وبوعيسى


عيشهم كان ثجيل شوي ودسم ، بس الكباب روعه ولا فيه ريحة

مثل اللحم اللي في مطعم دبي







لذيـــــــــذ اللحم بالعجين






واشترينا من عنده أكل تيك أوي حق السحور


لأنه باجر وقفة عرفه وقررنا نصوم في هاليوم







وعقب مرينا ع سوبرماركت كوري كبير وحصلنا فواكه وخضار وماتصدقون شوحصلنا

فرحنا فرحه لما شفناه

شو تتوقعون










حصلنا

جبن كيري وجبنة البقره


لاتضحكون علينا كان بالنسبه لنا هاي الاجبان كنز

عافانا الله ماعندهم أجبان ولاشي يبرد قلبنا

اشترينا بعض الاكل اللي نباه

الصراحه كنا وااااااايد تعبانين ومنهكين ، ذبحتنا الشمس في هاليوم

وع فكره المنطقه هاي فيها سوبرماركتات للجاليه المسلمه اللي هناك

واكيد بيكون في اختيارات أفضل من السوبرماركت الكوري


ولكن من كثر مانحن تعبانين ماكان لنا خاطر نتمشى في هاي المنطقه

ونستكشفها وندور سوبرماركت غيره


وطلعنا من السوبرماركت وكان قريب المغرب

ندور تكسي


وهنيه تمينا فتره لين حصلنا تكسي لأنه المكان وايد زحمه ويوله

وع طول رجعنا الفندق

وللاسف ماطلعنا عقب


الحين ندمانه انه ضاع علينا هاليوم بسبب اختيار خاطئ باختيارنا القصور اللي زرناها

وبسبب انه رجعنا بدري فندقنا وماطلعنا

كان افضل لو رجعنا وريحنا وعقب سرنا نتمشى في اسواق نامديمون الشعبيه اللي ماشفناها

ع العموم في وقتها كنا مرتاحين اني رجعنا غرفنا
@@ السعيد @@ غير متصل   رد مع اقتباس
قديم 11-08-2017, 05:36 PM   #10 (permalink)
@@ السعيد @@
أمير الرومانسية
 
الصورة الرمزية @@ السعيد @@

كوريا من ناحية النظافه

هي نظيفه ومب نظيفه

نظيفه ...

انه الشوارع والاماكن العامه كلها نظيفه ومايرمون القاذورات ع الارض

ومب نظيفه من ناحيتين ...

الأولى.. في كثير من الشوارع نشم فيها روائح خايسه

وغير طبعا روائح
المطاعم اذا مريتوا من عدالها

والثانيه .. وهذا الشي تفاجأت فيه ولوع جبودنا وهو انهم وايد يتفلون ع الارض (يعني يبصقون )

الحين في بمبي عرفنا انهم ياكلون باان وعشان جذي يتفلون

بس هنيه شو ياكلون عشان يتفلون طول الوقت

والله كنت أقرف وانا أدوس الارض أحسها كلها تفال

وأذكر واحد ونحن نمشي عداله قام تفل جدامنا ومب أي تفاله

انزين يالوصخ راعينا





يوم الاثنين يوم وقفة عرفه

11/14/ 2013



لأنه اليوم صيام فقلنا بنخليها تسوق ومابنرهق عمارنا

اتفقت مع بوعيسى انه هو يظل نايم مع عبادي ويرتاحون في الفندق

وانا والبنات نسير مول كويكس ونتسوق لين العصر

وعقب بوعيسى ايينا هو وعبادي عشان ندخل الاكواريوم اللي في المول

وعقب نسير نفطر

مول كويكس

COEX



موقع المول ع النت


Welcome to Coex


خريطة المول





نشينا انا والبنات متأخرين وكانت حرارة الجو





ركبنا التكسي بعد ماراويناه العنوان





وخذا منا الطريج نص ساعه كان بعيد شوي

وراعي التكسي كان يعرف انجليزي


وسولفنا وياه وعطانا وايد معلومات بس ما اتذكر شي من اللي قاله

وصلنا المول ونحن كلنا حماس



الصراحه ونحن يايين كوريا ماخذين فكره انه أسواقها تجنن

فكنا متحمسين وايد للتسوق

والاماكن اللي زرناها قبل للتسوق ماعجبتنا وايد وماحصلنا اللي يرضينا


ملحوظه

ترا التسوق يفرق من شخص لشخص

حسب حاجته وحسب ستايله وحسب ميزانته

وعشان جذي انا أعطيكم رآيي الشخصي ومن واقع تجربتي

ممكن تناسبكم وممكن ماتناسبكم


نكمل أحداث اليوم





وصلنا المول ودخلنا

























لاحظنا انهم ينسقون الزهور بطريقه حلوه والظاهر انه فيه احتفال بيكون في هالمكان

بس ماندري متى





















ونحن نمشي كانت الصدمه المره





لقينا لافته تقول انه المول مسكر للصيانه




صابتنا خيبة أمل

قلنا خلاص بنتمشى وبنستكشفه

لقينا فيه جزء مفتوح داخل المبنى بس مب تابع لهالمول وفيه محلات

تمشينا فيه وماعجبنا شي وكانت عدد المحلات مب كبيره

وفيه قسم كبير للمطاعم









وعقب رجعنا نمشي في صوب ثاني

وشفنا سينمات والمكان كبير









كملنا في اتجاه الاكواريوم ولما وصلنا وعرفنا مكانه

كملنا سيده ( ع طول ) لين شفنا محلات لوتي للديوتي فري ( يعني اسواق حره ماعليها ضرايب )

المحلات كلها ماركات ولكن عددها قليل

وفي المول فندق الانتر




دخلنا شويه وطلعنا ماكنا متشجعين نشتري ماركات لأنه عندنا نيه نسير الأوت ليت

ع فكره أنا ما أتشجع اشتري ماركات الا من اوروبا نفسيا ما اثق فيهم

شفنا انه هالمشوار طلع ع الفاضي

وفكرت في بوعيسى وعبادي وقلت مافي داعي أوعيهم وأخليهم ايون هالمشوار

وفي نفس الوقت مانقدر نتريا لين لعصر لين يقومون وايونا

ونحن خلصنا تمشي وفاضيين

فقررنا ندخل الاكواريوم بدونهم

وعقب كلمت بوعيسى وخبرته

وقال أحسن

يبا الفكه من المشوار الريال صايم

بس اتفقنا مانخبر عبادي عشان مايحط في خاطره ويزعل منا


@@ السعيد @@ غير متصل   رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are معطلة


المواضيع المتشابهه
الموضوع كاتب الموضوع المنتدى مشاركات آخر مشاركة
الدعم الأميركي أصبح حاضراً لكوريا الجنوبية في حال تعرضها لهجوم من الشمال الهيثم اخبار 24 ساعة - سبق عاجل من أنحاء العالم 1 03-30-2013 09:30 PM
الإندبندنت: الأمم المتحدة تدخل فى أول مواجهة مع النظام الجديد لكوريا الشمالية دمي وعشقي جزائري اخبار 24 ساعة - سبق عاجل من أنحاء العالم 0 02-13-2013 02:05 PM
الخارجية الأمريكية تؤكد تعليق تسليم المساعدات الغذائية لكوريا الشمالية وجدنا اخبار 24 ساعة - سبق عاجل من أنحاء العالم 2 03-31-2012 09:14 AM
تمرين مضحك جدااااا لكوريا الشماليه 2010 § √ الــمــدلــعــه √ § يوتيوب كورة - أهداف لقطات رياضية فيديو أهداف 3 10-21-2011 02:17 PM
فيديو زيارة مهدوش وميرال لكوريا موراكو فضائح ستار اكاديمي 11 Star Academy 14 08-27-2010 01:33 AM

الساعة الآن 01:13 PM


Powered by vBulletin® Copyright ©2000 - 2019, Jelsoft Enterprises Ltd. TranZ By Almuhajir
Search Engine Friendly URLs by vBSEO 3.6.0
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103