تصفح

سبحان الله وبحمده عدد خلقه ورضى نفسه وزنة عرشه ومداد كلماته ( ثلاثة مرات ) .

سبحان الله وبحمده سبحان الله العظيم ( 10 مرات ) كلمتان حبيبتان الى الرحمن وثقيلتان في الميزان




العودة   منتديات عالم الرومانسية > منتديات القصص والروايات > قصص وحكايات عربية وشعبية وعالمية

قصص وحكايات عربية وشعبية وعالمية أروع القصص العربية الخيالية و قصص الحب الغرام العشق بين العشاق في عالم الروايات والقصص الطويلة, تمتع بقراءة القصص بدون اشتراك لأنها خدمة مجانية من منتديات عالم الرومانسية

حب على هاوية الزباله

موضوع مغلق
 
أدوات الموضوع انواع عرض الموضوع
قديم 07-12-2004, 02:23 AM   #1 (permalink)
ملقوووووف
رومانسي مبتديء
 

ADS
Wink حب على هاوية الزباله




بـــسم الله الــرحمــن الــرحيــم

كلمــة

أعزائي الأعضاء / نحن نعيش في حياة تتغير مع كل جيل ،، حياة تزرع ثقافات على مر العصور وتختلف طرق توصيل تلك الثقافات باختلاف التطور والفكر ..
كانت الثقافات قديما عن طريق الكتب والبحوث واليوم زادة طريقة في توصيل تلك المعلومات ألا وهي الانترنت . كما تختلف توصيل المعلومه باختلاف المكان والزمان فهناك معلومات تتكون بطريقة جديه وهناك معلومات تصل بطريقة فكاهيه .
<<< الله يعينك على العالم اللي مشدده في الجاد بيخلون الموضوع كله ويردون على هالمقطع .. بس .. اكثرهم يحسب ان الجد والفايده في الجاد بس .. المهم .. ؟؟

( حب على هاوية الزبالة)

في أرجاء الفضاء الفسيح وتحت عدسةٍ مكبرة نرى كوكب الأرض بثلاثة ألوان معتادة الأزرق ، والأخضر ، والأصفر هكذا ينظر الجميع إلى كوكب الأرض إلا من فقد حاسة البصر أو انه يمتلك عمى ألوان لدرجة أنه لا يفرق بين أمه وأبيه وبين الذكر والأنثى وكذلك الألوان ... نأتي لنضع العدسة المكبرة على كوكب الأرض لنرى جماله وطبيعته التي شوهها الإنسان ... نضع العدسة بالتحديد على شرق آسيا بتحديد اكثر ولا يكثر على الخليج ونقرب أكثر ونضغط على بؤبؤ العين لنرى الدولة السعودية ومع ضغط البؤبؤ نعقد الحواجب بكامل قوتها لنرى مدينة الرياض ومع نظرنا لها نمسك بالعدسة بقوة ونقوم بصنع مطبات في الجبهة مع زرت البؤبؤ وعقد الحاجب لكي نرى منزل صغير يقع في احد ضواحي المدينة الخربة .. منزل يحمل عدة نوافذ لغرف كلها ذات شبك مزخرف إلا نافذة واحدة كان شبكها مصنوع من اقفاص الدجاج وهذه الغرفة هي غرفتي انا (( خلونا نتكلم بالعامي انعفط لساني وانا اتكلم باللغة العربية ))



(( البـــدايـــة من جديد))



كنت نايم في الغرفة ومنبطح على السرير ومتحظن كمبل مقطع وطالعه أطراف أصابع رجليني من خفوسة كنها جر ابيع تستكشف المكان .. كل اصبع ينفع يكون تكملة منقلة
وأنا أتقلب على السرير وأوزع ابتسامات كني واقف على خشبة مسرح متآكل من كثر الدود والجمهور يصفقون ويعبرون عن فرحتهم بترجيم الطماط والملاعق .. وانا أتفادى الضربات واتحرك يمين ويسار .. وأنا اتحرك ... سمعت صوت طرااااااااخ ... صحيت من الوجع لقيت راسي ناشب في الكمدينه وجسمي مرمي على الارض ... وجبهتي مورمه كنها وحده حامل في التاسع وولدها رافض ينزل إلا بمصعد

... حاولت اني احك الجبهه بس مافيه امل خفت يطلع منها مارد والا شي .. وأنا افكر سمعت صوت رجفه رجل في الباب ثمن انفتح علي كأنه حمله تفتيشيه من الضباط الأمريكان .. دخلت أمي وهي طاقة لطمة باشيلة و تصارخ نعنبو خيرك كل هذا نوم وبعدين الغرفة صارت مثل القبر اطلع من البيت خل الهوى يدخلها اقسم بالله فيه ريحة تفجر خشم المزكوم .. ريحة كنها ريحة اسطبل خيول محمد بن سعود الكبير .. قلت يمه هدي أعصابك على هالطمة ناقصك سيف وتصيرين ننجا .. وش فيها غرفتي ؟ .. قالت لي وهي تفك اللطمة ... شفها زين لو اجيب جراذي يترفعون يعيشون فيها وينامون في الحوش ، وبعدين وأنا أمك حاط صور هالمطربات على الجدار يعني من جمالك عشان يلتفتون عليك وإلا من زين صوتك عشان نقول انك زميل لهم في الفن ... حدك ممثل ودايم تنضرب في كل دور ... والمكافأة اللي يعطونك أيها تروح كلها في الصيدلية اللي في أول الشارع قطن ، وشاش ، ومعقمات حتى الصيدلية معد تغطي صرنا نكلم الموزع يأمن لنا الطلبات ...

ناظرت أمي في الجدار وتأشر وهي تقول شف صورة هالمطربة بالله ما تستحي تحط وحدة شبه مفصخة .. ناظرت وقلت هذي يمه ( اليسا ) في فيديو كليب عيشالك ..قالت أمي عسى مهيب تقول عايشتن لك وأنت مصدق.. ياولدي ودي وأمنيتي أن بيتنا كله مصنوع من مريات عشان تشوف وجهك وين ما تروح .. قلت يمه طابه من اليوم في شكلي انا جاي من فراغ محد قالك هذاك اليوم حبي وائل كفوري وتزوجيه وجيبوني .. مسكتني مع اذني وهي تقول تطنز على ابوك .. أبوك اللي معيشنا والا أنت سعسعه في هالشوارع كنك قطوة من شارع لشارع ... وإلا مضيع عمرك في هالتمثيل .. وما يفقع قلبي إلا هالاقنعه المرعبة اللي في الغرفة أنا متأكده لو يشوف مخرج أمريكي وجهك بيطلع أول فيلم مرعب بدون مكياج .

قلت يمه أنت من سويتي شعرك مثل ( غطروفه ) جديلتين كنهم أريل تلفزيون أبيض وأسود وأنا غاسلن يدي لا وهالحنه اللي عليك من شافه قال سابحه في طين .. يمه بالقوة بتخفين الشيب .. على هالجلال اللي عليك كنك موضي علف وهي حاطة ديرمانه .. قالت أنا أمك تتكلم علي كذا .. قلت يمه حقك علي وآسف بس امزح معك وخصوصا أن حنا عائلة لو ما لقينا أحد نحش فيه ولا نعلق عليه علقنا على بعضنا ... قالت أمي لا فيه واحد عند الباب حط حرتك فيه .. قلت لها منهو

قالت خويك اللي اسمه ( صغيرون ) ثمن سكتت وقالت وأنا أمك أسم ( صغيرون ) معناته بالدنمركي قليل الدسم ناظرت في أمي وقلت لها يمه أنت هالحين أعرفي تكلمي عربي بعدين دوري على اللغات الثانية .. قالت الحمد الله أمك تعرف تقرى وتكتب هالحين .. قلت لها يمه .. قسم بالله مدرسة الليلي تشتكي منك ...المديرة تقول غيرنا المناهج وحلفت لي الوكيلة انهم غيروها وانت الى هالحين تجيبين كتاب القراءة أيام ما كنتي في المدرسة وانت صغيرة قبل ما يخطفك أبوي على حصانه الأعرج .. اللي مليان علل ابداءا من الألتهاب الرأوي ألين الوباء الكبدي .. انا ما أدري كيف مشى هذاك الحصان وشالكم بس

وأنا أتكلم سمعت واحد يتنحنح .. ثمن قلت هلا (صغيرون ) وأنا اكلمه أقول لمي تغطي وأمي تحرك بيدها تقول اوووووه فكنا قال إيش تغطي عقب ما شابت قالو لها تغطي .. ناظرت فيها وعيوني طايره وأنا اقول حتى المثل غيرتيه اخبره عقب ما شاب ودوه الكتاب وبعدين يمه أنا ما أبي (صغيرون ) يشوفك هو ويا شعرة اللي كنه شعريه منكبه على راسه ...وثاني شي يمه أنا قايله انك تشبهين سعاد حسني وأخاف يشوفك يدري اني كذاب .. ضحكت وهي تقول وربي أنا أحلى منها .. خله يدخل عشان يعرف الفرق وبعدين انا مربيته بعد وفاة اهله .. عادي خله يدخل صح اني دايم اطلع له بالبرقع ..هي قالت برقع حطيت يدي على وجهي وأنا اقول يمه لا تذكريني بالماضي ...ليش كل ما جيت انسى تذكريني .. يمه انسي أيام البرقع تكفين كنك ساكنه في بر ومعك طاسه مليان حليب خلفات ...

ضحكت وقالت خله يدخل هو مثل ولدي .. قلت مافيه أمل ادخله .. ما أبي بكره يعلم العيال أن (ام ملقوووووف ) تشقر حواجبها .. وأنا أتكلم قمت لفيت وجه أمي بالشيله اللي عليها وأنا الف احس ان يدي خدرت من طول الشيله ..

خلصت وقلت ادخل يا ( صغيرون) أول ما دخل علي كان لابس بدله وكرفته ووجه ازرق ويا الله يا خذ النفس .. جيت وجلسته على الكرسي وقلت وش فيك اجيب لك مويه ؟.. قال لا .. قلت طيب وش فيك .. قال جب مقص .. قلت نعم قال جمب مقص طمرت للكمدينه وجبت مقص وقالي قص الكرفته ... أحس اني بموت أطرافي ثلجت .. قصيت الكرفتة من الرقبه .. ثمن اخذ نفس من قوته ابترمت امي في الغرفة هي وياشيلتها لدرجة أنها تعلقت في رجل السرير ورجليها تلعب في الهوى وانفخصت زنوباتها وطارت ودخلت في خشم (صغيرون) ثمن طاح على ظهره .. وهو يحاول يتنفس .. والزنوبه ناشبه داخل خشمة .. قلت لا تتحرك .. يمه هاتي زراديه ... والا منقاش خلينا نطلع هالزنوبه.. والا نربط خشمة في صدام الجمس ونسحبه .... ان الله باليني بلوه في هالدنيا ..

عطتني أمي الزراديه ودخلتها وطلعت الزنوبه ثمن قلت لـ (صغيرون) ياخوي فتحت خشمك كبيرة مره مهوب على اسمك .. حاول تحط عليها غطى مثل الغطيان اللي في الشوارع العامه .. عامل خشمك معاملة فتاشة والا فتحة خزان لازم تغطيه عشان البزران ما يطيحون فيه .. ضحكت امي وهي تقول اتلم المتعوس على خايب الرجا .. قلت يمه جيبي لنا شاهي وخلي عنا النقل من المسلسلات .. طلعت أمي .. وجلست مع ( صغيرون ) وقلت وش فيك ... قالي ( ملقوووووف )
أنا قررت أني اتزوج .. قلت له نعم ! .. قالي ابي أتزوج أبي اشوف ذريتي .. قاطعته وأنا أقول من قال أن حنا نبي نشوف ذريتك .. كافينا واحد في الحياة مبهذلنا .. وبعدين يا ( صغيرون ) شكلك ما يساعدك أنك تنجب بصراحه .. لا تزعل مني .. ناظرني وهو يقول ليش .. قلت يا خوي شف وجهك وشف جسمك كنه عربانه يجرها حمار .. حاول أنك تنسى الفكرة .. قال لي ما أقدر يا ( ملقوووووف ) أنا أنسان احب واعشق .. قلت الله الله .. يا عيني من تحب .. قالي احب وحده مدرسة وأبي اتزوجها .. ناظرت فيه وقلت متى حبيتها ؟ وهل هي شافتك ؟ ... قال ايه شافتني وميته علي .. قلت بصوت واطي متأكد انها ميته عليك وإلا ماتت منك يوم شافتك ترى فيه فرق في الجملتين دقق تكفى .. قالي ميته علي وتقول أبيك تتزوجني تعال أخطبني من أبوي .. وأنا بصراحه جايك أبي فزعتك يا ( ملقوووووف )

ناظرته بطرف عين ثمن قلت يا ( صغيرون ) أنا اخاف انك تمر بمرحلة هذيان من عقب خنقة الكرفته قبل شوي ... قال ما فيني شي .. بس أبيك تساعدني .. انت ممثل وتقلد أصوات وتقدر تتنكر بشخصيات .. أبيك تتقمص شخصية شايب على انك أبوي وتجي معي .. قلت يا حبيبي بيكشفونا أول شي شف خشمك وش كبره مقارنتاً بخشمي.. وثاني شي شف شف عيوني وعيونك .. مافيه أمل اصير أبوك .. قالي ( صغيرون ) العيون صغرها .. قلت طيب والخشم اجيب جنط وايت (( تنكر )) واحطه في وجهي .. والا كيف ..

جلسنا نفكر شوي ثمن قالي شف ..إن تأزمت الأمور قل أني اشبه لأمي .. ناظرت فيه ثمن قلت أخاف ينقد على ذوقي ... ويقول يوم ياخذ أم هذا ما فكر وراجع نفسه وقرى صورة البقرة والمعوذات .. قام ( صغيرون ) وطاح عند رجليني وهو يقول (ملقوووووف ) طلبتك أنا أحبها وأبيها على سنة الله ورسوله .. قلت يا عمي قم .. وين حنا جالسين فيه في مسلسل بدوي عشان تطلبني وتطيح عقالك عندي .. خلاص قم جعله في حواجبك اللي كنها شارع الحوامل بعد نص الليل .. أنا راح افزع معك عشانك صديق .. وأنا من الناس اللي يقدر الصداقة لأن الصداقة مهوب مجرد كلمة الصداقة شي كبير شي ما يقدر بثمن .. أنا قلت كذا على طول طب علي وقام يبوس .. وكل منطقة يبوسها في وجهي يموت الشعر اللي فيها .. قلت يا ( صغيرون ) شفايفك ألعن من مرض الثعلبه أبعد ... وفوق هذا كله وزنك الله يرحم والديك .. انا ما أدري على إيش مسمينك ( صغيرون ) مع العلم اتوقع لو تمشي على رجليك في الشارع ياخذ عليك أمن الطرق رسوم حموله زايده على الزفلت

وأنا أتكلم وقفت قدام المراية وجلست .. اضبط المكياج .. وأحط الدقن واصبغ حواجبي أبيض وسوي تجعيدات خفيفة على خدودي عشان اصير شايب .. وأنا أشتغل قلت لـ ( صغيرون ) أقول البنت هذي كيف تعرفت عليها .. انا قلت كذا قام يتنهد .. وهو يتنهد التفت عليه وقلت منتب عاقل يا حسين فهمي وش القصة ... قالي شفتها في حديقة الحيوان وحبيتها .. انا وقفت ثمن قلت نعم ... ليكون بس كنت متكي عند قفص القرود وعطتك وحده منهم وجه مع غمزة وحبيتها .. قال لا يا ( ملقوووووف ) كانت جايه مع ابوها .. وأنا واقف اتفرج على التماسيح .. وأرمي عليهم قطع من الفش فاش اللي معي وأقولهم كلوا .. ناظرت فيه وقلت ترمي فش فاش على التماسيح آكلين لحوم وتقول كلوا .. زين سكت لك التمساح لو أنا مكانه كان اكلم الحارس واقوله ابيك تطلقني ساعة بس .. وبعدها اعدموني .. الساعة هذي تكفني عشان اكلك انت وكرفتك الملونه اللي كنها عصير طبقات ناقصة شفاط ..

وقف ( صغيرون ) وهو يقول ( ملقوووووف) أنا حبيتها وشفت في عيونها حزن .. حزن غريب .. من هذاك اليوم وصرت اجي لحديقة الحيوان كل يوم .. قلت وأنا اضحك زين ما حطوك في قفص مع العلم انك بتجيب لهم ذهب لو حطوك .. على انك حيوان مهجن جديد .. داخله عليك لعبة الجينات وانك مشروع جينات ناجح مع سيد قشطة والفريد من نوعه راح يكون لك شأن كبير ... قرب عندي( صغيرون ) وهو يقول .. ( ملقوووووف ) المرايه اللي قدامك تشوفها زين .. قلت ايه وش فيها .. قال شف وجهك وأنت تعرف .. ناظرت وقلت مافيه شي .. قال شف زين .. قالت ياهووو مافيه شي ... قال شف عيونك هالصغار كنهم قملتين طايحين من حواجب ..

قلت يا ( صغيرون ) أنا أمزح معك ابي افرفشك ... طيب خلنا في العمل هالحين .. أبيك تكلمني عن أبوها .

تنهد وهو يقول .. يا( ملقوووووف ).. المشكلة أبوها ... قلت وأنا اصلح المكياج ليش ؟ قالي دايم ياخذها معه لحديقة الحيوان .. ناظرت فيه ثمن قلت غريبه هالعائلة للدرجة هذي تحب حديقة الحيوان .. قال مهوب حب ياخذها عشان عمله هناك .. قلت وش يشتغل سكيرتي .. قال لا .. قلت اجل مدير الحديقة .. قال لا .. قلت في الإدارة .. قال لا .. قلت اجل وش يشتغل .. قال يشتغل مدرب اسود .. هو قال مدرب أسود وقف قلم الكحل في يدي .. ثمن بدى فكي اللي تحت يتحرك .. كأنه واحد قالوله ربحت مليون وانشل عليهم في نفس اليوم ..

قلت نعم مددددددررررررب ايش ... قال مدرب أسود .. قلت وأنت يوم انك عارف انه مدرب أسود.. ليش بتاخذ بنته .. تبيه يدربك بعد العصر إذا خلص من الأسود ..قالي هذي ضريبة الحب .. قلت يا عمي يضرب الحب .. تنهد ( صغيرون ) وهو يقول شو بيزل .. ناظرت فيه وقلت يا( صغيرون ) صليت صلاة الأستخارة قبل ما تجيني .. قال إيه .. قلت متأكد ... أخاف أن رحنا معد نرجع ... ترى هالايام فيه نقص في اللحم في حديقة الحيوان .. يعني راح نكون وجبه دسمه للأسود . خصوصا أنت ... إن يتشنج فك الأسد ما خلص لحم فخذك .. وبيغيرون له طقم سنون والسبه لحمي قاسي .. خصوصا أنه مليان شعر يعني كل لقمة يحط الأسد يده في لسانه عشان يطلع الشعرة ..

قالي ( صغيرون ) توكل على الله وخلنا نمشي .. قلت يا الله .. ثمن قلت لحظة ودي أكتب وصيتي لأهلي لو صار لي شي .. ناظرني وقالي يا عمي أي وصية هالحين من سمعك قال أراضي شمال الرياض كلها لك .. أمش .. قلت هد شوي .. تكفى ترى يا الله تشيليني رجليني جلست أمشي وأنا اتكسر وتعفط .. مسكني ( صغيرون ) وهو يقول والله انك تتقن الشايب تمثيلك رهيب ..ناظرت فيه وقلت أي تمثيل الله يحييك أنا توني احس بمعنى كلمة كساح .. ولين عظام .. وشلل أطفال من بعد كلامك .. قالي لا بالعكس شكالك توب مافيه أمل يكشفك .. ناظرته ثمن قلت أموت وأعرف وش حبت فيك وبعدين اللي هذا أوله ينعاف تاليه حب في حديقة حيوان

قالي ( ملقوووووف ) لا تذكرني بأول مصارحه لي معها... يوم كنت جالس عند بحيرة البجع أتفرج وهي تمشي بدلع ثمن زلقت وانكسر كعب جزمتها وجيت عندها بسرعة البرق وقلت بسم الله عليك ... اوصلك بسيارتي .. وقفت وطارت عيوني ..ثمن قلت .. اقول ( صغيرون ) أنت شارب شي .. قالي لا .. قلت اكيد شارب من موية البحيرة .. وش اللي انكسر كعب جزمتها على طول تقولها اوصلك بسيارتي .. والله لو ان سيارتها خربانه عشان تقول هالكلمة .. ترى كل اللي حصل ان كعب الجزمة انكسر بس .. قالي مهوب المعنى كذا .. المعنى أني أبي ابين لها اني أحبها .. قلت يا عيني ياهو يا الرمنسي .. قال اييييييييييه يا ( ملقوووووف ) انا طول عمري رومنسي .. قلت ماضنيت أنت طول عمرك حمار منسي .

قالي المهم خلنا لا نضيع وقت .. بسرعه .. انا أنتظرك في السيارة .. نزل وجت أمي ومعها الشاهي .. قلت يمه بدري لو هي لحمة بعير كان استوت .. قالت وأنا أمك خلص الغاز وكملت الشاهي على ولاعة لقيتها طايحه قبل أمس في الحوش .. رفعت يدي للسماء من ضيقة الصدر وقلت يا تاخذني والا تاخذ ( صغيرون ) وتخلي امي لنا ذخر .. وتزيد حسن التدبير عندها يارب .. قلت كلامي وطلعت .. أنا وثوبي البني وعلي زبيريات ودقن يلعب فيه الهوى وشماغ لونه برتقالي من كثر الوصخ ..

وقفت وقرب ( صغيرون ) السيارة .. ناظرتها وذكرت موقفي معه هذاك اليوم يوم انكتم وقلت ( صغيرون ) صلحت الدرايش ترى مافيه أمل اركب معك لو كانت خربانه ... المؤمن لا يلدغ من جحره مرتين ... قال ايه .. هو قال ايه على طول جيت وركبت .. وشفت أنواع الزبايل والوصاخه .. قلت يا ( صغيرون) أبي اعرف شي واحد انا مخاوي ابو جعل وإلا آدمي ... ياخوي نظف سيارتك ليش ما تعيش إلا على وصاخة .. وبعدين شف مافيه مكان من كثر الوصخ حتى لون الكرسي أبي اعرفه ما عرفته من الحليب اللي ناشف عليه .. قال يا ( ملقوووووف ) أنا يذبحني الحرقان لازم أشرب حليب السعوديه وأرمي العلبة على المرتبه وتنقط .. ناظرت فيه وقلت .. أقول حلاة هالجبهه اللي انت مطلعها كنها ركبت فيل مثنية .

جلست أناظر تحت وجمب وقلت ورب البيت أحس أني جالس في مكب زبايل الرياض .. يا عمي بسرعه ادعس خلنا نوصل .. والله يستر علينا .. أنا خايف ..

قالي لا تخاف يا ( ملقوووووف ) الأمور كلها بتكون زينه .. ناظرت في وجهه ثمن قلت أبي اعرف أنت ليش واثق .. قال أحساس في داخلي .. هو قال أحساس قلت رجعني للبيت ..قال ليش .. قلت أنا من أسمعك تقول أحساس وأنا اعرف ان مشاكل الدنيا كلها بتجي ما قد مشينا ورى أحساسك الا وتنقعنا في سجن والا ناخذ قسايم والا تتفتش السيارة في نقاط التفاتيش وهالمرة شكلها بتكون النهاية في بطن أسد ... لأني احس ان احساسك مثل نظر المطرب سيد مكاوي أعمى .

خلصت كلامي .. وقالي ( صغيرون ) هذا البيت اللي في الزاويه .. قلت بعد عرفت بيتهم .. قال ايه كل يوم الحقهم واجلس قدام البيت اراقبهم .. ناظرت وقلت كيف تراقب .. قال اطق لطمة ونظارات شمسية واجلس قدام الباب حقهم من الجهه المقابله واراقب .. هو قال كذا انا رفعت يدي وقلت ربي انت مجيب الدعاء خذه وريحني .. قالي ليش .. قلت .. ما ادري يا ( صغيرون ) أحس ان فيك عرق نعامة .. وش اللي تلبس نظارات ولطمه يعني خلاص مهوب شايفك ان لبست هذولي ... وأنا هالحين وأقولها بكل صراحه معد الوم النعامه على غبائها لأن ربي ما عطاها عقل مثلك .

حط يده على فمي وقال .. ( ملقوووووف ) هذا أبوها طلع من البيت شكله بيكب الزبالة .. قلت وينه .. قال هذاك اللي معه جلد الخروف .. قلت بخوف وش قلت جلد .. يعني أكل الاسود هالحين والا توه .. قال ( صغيرون ) ما أدري انا جالس معك .. قلت يا ( صغيرون ) ليش ما تنساها وتاخذ لك حبشيه وجها كله مشطب وملعوب فيه اكس اوو وبالمرة تكون ازين منها وتلاقي احد تعايرة وتقوله أنا أزين منك .

قالي بكل برود .. أنزل هالحين بسرعه ولا تنسى أنت أبوي جاي من الديرة ... قلت أنا عارف وش أبقول .. نزلنا وجينا عند أبو البنت وقلنا له مرحبا .. ناظرنا بطرف عين ووجه كله شنب لو احلق شنبه وآخذ الشعر أفصل منه مطرحه نفرين وخمس فنايل شتويه .. قاطعنا وقال خير وش تبون .. قلت أنا بصوت شايب .. وأنا أبوك صعبة نتكلم على البيبان والموضوع اللي عندنا نبيك تسمعه .. قال تفضلوا .. دخلنا البيت أول ما دخلت وقفت ووقف معي شعر رجلي يوم شفت أسدين قدامي يمشون في الحوش بدون قيود .. قلت ( صغيييييييييروووووون ) طلع صوتي كنه تلكس .. قال نعم قلت شفففف على يمينك ناظر وشمر فنيلته وارتفعت يديه فوق .. وطلعت حواجبه كنها ثماني وثمانين تقسيم سته .. شافنا الرجال أبو البنت مرتبكين قال لا تخافون توني مأكلهم ثلاثة خرفان .

قلت في نفسي الحمد الله فلتنا من وجبة اليوم أنكتب لنا عمر ألين الوجبه الجاية بعد ثلاثة أيام أو خمسة .. قاطعني الرجال وقال ادخلوا .. دخلنا للمجلس .. وجلسنا وجلست اكح كني شايب مكربن .. والرجال يقول هاه وش تبون وش الموضوع اللي ما ينسمع عند الباب .. قلت وأنا انغز ( صغيرون) تكلم يا ولدي وش عندك .. ناظرني ( صغيرون ) وهو يقول انت أبوي تكلم انت .. مهوب أنا .. قلت وأنا أرتجف أبوك طاح طقم ضروسه بعد اللي شافه وسمعه

قال الرجال وش فيكم متبرجلين فيه شي ... قلت لالالالا أبد مافيه شي بس كنه برد .. قال طيب تكلموا دام مافيكم شي .. ناظرت فيه وفي وجهه وفي عيونه كنها صحون نواشف مطيرها فوق .. وقلت في نفسي هذا وحنا ما قلنا شي مطير عيونه كيف لو نقوله وش بيسوي فينا .. قاطعني وقال تكلم .. انت وياه .. قلت وأنا مرتبك الله يسلمك حنا جايين نخطف يد بنتك ... قصدي نخطب يد بنتك .. أنا قلت كذا حسيت أن عيونه خذت وجهه كله ونفتحت على الأخر وقال نعم .. ممكن تعيد اللي قلته قبل شوي .. قلت هاه ماسمعتني .. قال ممكن تعيد .. ناظرت فيه وفي عيونه وقلت تصدق اني نسيت وش قلت ذكرني يا ولدي يا ( صغيرون ( ..

قال ( صغيرون ) نبي بنتك على سنة الله ورسوله .. قلت انا أيه نبيها لولدنا ( صغيرون ) قلت أسمه متردد ثمن التفت عليه وقلت لو أسمك ( وائل وإلا لؤي ) وأنا محمد حمزة مهوب أحسن بدال ( صغيرون ( كنه أسم سنجاب متوهق فوق شجرة ... ناظرنا شوي ثمن قال الرجال ماعندي بنات للزواج .. قال ( صغيرون ) الا فيه وبنتك مدرسه وعمرها واصل لسن الزواج .. طارت عيون الرجال .. وأنا دخلت في ازرة الكنب اللي جالسين عليها من الخوف .. قال شف بنتي ما تبي تتزوج .. وهي رافضة الشي هذا !! توه مخلص كلامه

سمعنا البنت من ورى الباب تقول يبه أنا أبي الزواج .. ارجوك لا ترفضهم أنا أبي اتزوج حالي حال البنات .. أنا عمري كل ماله ويتقدم واللي في عمري عندهم عيال .. قال الأبو وهو معصب ادخلي داخل ..

قالت البنت والعبرة خانقتها ... يبه أنت حرمتني الزواج عشان راتبي تاخذه كله لك ... أنا معد أبي اشتغل أبي أعيش حياتي مثل أي بنت عايشتها بيت وزوج وعيال ... أبي احس أني عايشه مهوب ميته .. يبه ما قد جيت مره وسألتني عن شي في نفسي .. كنت أتعذب لما أشوف بنات أقاربي اللي في عمري متزوجات ويطلعون ويروحون ويجون .. كنت أبكي أخر الليل لوحدي .. عمري ما حسيت بطعم الحياة .. كنت اتمنى الموت على عيشتي هذي ..


قال أبوها اقول تعوذي من ابليس وأدخلي .. قلت أنا خلنا نسمع البنت وش تبي تقول عطها فرصة تقول وش اللي في داخلها .. قلت كلامي هذا بدون ما ادري عن نفسي حسيت بشي غريب حسيت بقوة وعطف وحزن .. حسيت أني لازم أخليها تتكلم .. قاطعتني البنت وهي تبكي .. وتقول يبه أرجوك ... أبي اكلمك عن مشاعر أي بنت في الدنيا .. البنت مهوب مثل الرجال يتحمل كل شي البنت عواطفها هي اللي تقودها البنت حساسة وأي شي يجرحها لو كلمة صغيرة ممكن تخليها تبكي الليل كله ... عشان كذا كنت أميل للوحده وأكره أني أروح معك لعزايم أقاربنا أحس ان الكل يناظرني بعين الكل في عينه تسائل ليش ما تزوجت وش فيها ... أحسهم يبعدون بناتهم عني كأني موبؤة .. تخيل الموقف لما تكون جالس مع ناس والكل يبعد عنك بالفعل لكن بالقول يوهمك انه جمبك ومعك ..

أنا من بعد وفاة أمي معد صرت أشوف ألوان الحياة معد أشوف الحياة الا لونين أبيض وأسود بس ... أحس أن العنوسه بدت تسري في داخلي خلني اعيش باقي عمري لو سنه أو سنتين بس أبي احس اني بنت لها حقوق في هذي حياة .. خلني أمشي على الطريق اللي تمشي عليه أي بنت انها تتعلم وتكبر وتتزوج وتنجب ... أرجوك يبه فكر وحكم قلبك ضيعت عمري اللي راح عشانك .. عشان ما أبي اكسر كلمتك ... لكن هالحين أبي عطفك وأبي حبك وأبي ما تخليني اذبل في بيتك واعذرني على كلامي هذا يبه بس كنت محتاجة أني أتكلم لأن الصمت قتلني ومالقيت أحد جمبي أشتكي له بعد وفاة أمي ..وبعد بنات عمي عني .. أنا أبخليك لضميرك ولعواطف الأبوة .

قالت كلامها وطلعت والعبرة خانقتني .. ثمن التفت على أبو البنت وقلت له أسمعني أنا أبقولك شي وأبيك تعطيني حلمك ..شف الجنة حفة بالمكاره والنار حفة بالشهوات لا تخلي حبك للمال يعمي عيونك ويقتل سعادة بنتك .. صدقني الفلوس عمرها ما كانت مشكله الفلوس حنا اللي نصنعها وهي تروح وتجي لكن العمر والحب عمرهم ما يتعوضون ان خسرناهم كأننا احرقنا ورقة ورمينها في مهب الريح وصعب استرجاعها .

واحب أقولك أني مانيب أبو ( صغيرون ) لكن أنا زميله وهذا الدقن تركيبه ناظرني بعين مليانه تعجب وأنا اشيل الدقن وهو يقول كنتم تكذبون علي .. قلت لا بس أنا جاي مع ( صغيرون ) عشانه يتيم أمه وأبوه ميتين .. وكصديق ومن واجب الصداقة أني أوقف معه ووقفت معه وقفة في الحلال وكنت راح أقولك كل شي لو أنت وافقت ... لكن شكلك مقتنع بكلامك .. التفت على ( صغيرون ) وقلت خلنا نمشي يا ( صغيرون ( اللي يعيش في الدنيا ياما يشوف .. جينا بنطلع قال الرجال وقفوا ...

التفتنا عليه وقال ... وهو يحبس عبراته .. كل أنسان يغلط ومافيه شخص معصوم .. وانا كنت مغمض وفتحت مافكرت مره في سعادة بنتي كل اللي افكر فيه كيف استفيد منها وأخليها تساعدني في مصاريف البيت وكيف اخذ راتبها .. مافكرت أنه يجي يوم وتكبر وتكبر الغريزة اللي فيها انها تعيش وتنجب وتربي .. أنا أعترف أني أب أناني .. لكن أبقول كلمه الله يجزاكم خير اللي جيتكم هذي صحة في داخلي حاجات كثيرة .. وأنا موافق .. بس اهم شي سعادة بنتي ..



(( وقــفـه ))

أحب أن اعتذر لجميع اللذين ذكرت أسمائهم في القصة
وسامحنا يا (( صغيرون )) على المزح .. ترى ما حطيتك الا عشاني امون عليك
هذا (( صغيرون )) اسم واحد من الشباب في الحاره اخاف يدخل المنتدى ويشوف اسمه ويزعل


واسف على الأطاله حب على هاوية الزباله




لقافه صح حب على هاوية الزباله




التعديل الأخير تم بواسطة ملقوووووف ; 07-12-2004 الساعة 04:14 AM
ملقوووووف غير متصل  
قديم 07-13-2004, 09:00 AM   #2 (permalink)
Bank33
رومانسي مجتهد
 
وسع الله صدرك مثل ماوسعت صدري....................مدري من وين تجيب هذة السوالف ( هلوسة ) اسلوبك التفصيلي العامي يعجبني ...........سلمني على صغيروووووووون.
Bank33 غير متصل  
قديم 07-15-2004, 06:53 AM   #3 (permalink)
ســــحر الشرق
رومانسي مبتديء
 
Question

هههههههههههههههههههههههههههههههههههههه

حلوووووووووووووه ويعطيك العااافيه

ونهااااااايه القصه مااااااااااااااااا تشبه ابدااااا فيلم مصري ابيض وااسوووووود
ســــحر الشرق غير متصل  
قديم 07-15-2004, 10:21 AM   #4 (permalink)
ملقوووووف
رومانسي مبتديء
 
شكراً على المرور يا Bank33






وانشاء الله دووووم يكون صدرك وسيع







وانشاء الله اسلم لك على صغيرووون








لقافه صح
ملقوووووف غير متصل  
قديم 07-15-2004, 10:23 AM   #5 (permalink)
ملقوووووف
رومانسي مبتديء
 
شكراً على مرورك الكريم يا سحر الشوق




ويعطيك الف عافيه




واصلاً نهاية الفيلم نيجيريه مقتبسه من قصه اثيوبيه







لقافه صح
ملقوووووف غير متصل  
قديم 07-18-2004, 02:46 AM   #6 (permalink)
ملوك
رومانسي رائع
 
ههههههههه

يسلمووووووووو ابو اللقافة على القصة الحلوة يعطيك العافية
ملوك غير متصل  
موضوع مغلق

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are معطلة


الساعة الآن 11:23 AM


Powered by vBulletin® Copyright ©2000 - 2019, Jelsoft Enterprises Ltd. TranZ By Almuhajir
Search Engine Friendly URLs by vBSEO 3.6.0
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103