تصفح

سبحان الله وبحمده عدد خلقه ورضى نفسه وزنة عرشه ومداد كلماته ( ثلاثة مرات ) .

سبحان الله وبحمده سبحان الله العظيم ( 10 مرات ) كلمتان حبيبتان الى الرحمن وثقيلتان في الميزان




العودة   منتديات عالم الرومانسية > منتديات القصص والروايات > قصص وحكايات عربية وشعبية وعالمية

قصص وحكايات عربية وشعبية وعالمية أروع القصص العربية الخيالية و قصص الحب الغرام العشق بين العشاق في عالم الروايات والقصص الطويلة, تمتع بقراءة القصص بدون اشتراك لأنها خدمة مجانية من منتديات عالم الرومانسية

المعالم المحرمة ... الانثى....الذكر .... فصول العلاقات

موضوع مغلق
 
أدوات الموضوع انواع عرض الموضوع
قديم 07-08-2008, 01:48 PM   #1 (permalink)
Mar00m
رومانسي مبتديء
 

ADS
المعالم المحرمة ... الانثى....الذكر .... فصول العلاقات




السلام عليكم ورحمة الله وبركاته
قرأت الرواية التالية في احد المنتديات وحبيت اني اشارككم فيها
تقبلوا موضوعي

.. عزيزاتي .. أعزائي ..
بعد عناء التفكير .. و طول التنديد .. ونذير ب شؤم مجهول ..
فقد توكلت على الله في كتابتي لهذه السطور ..
لأكون بذلك أضع ملفا أخر لما هو بين السطور .
ولربما يقول البعض أن هناك تجاوزا لحدودي لبعض الخطوط الصفراء ..
ولكن بنظري أنني لربما قد تجاوزت الحمراء منها , وذلك لرغبتي الشديده لوضع الجميع على أرض الواقع ..
والحقيقه التي نحاول دفنها وبذلك لا يوجد من لا يعرفها ومن كان بالخارج يجهلها ..
.. وبما أن وسيلة القراءه أسرع وأقدم وأسهل الطرق لعقل القارئ , حاولت بطريقتي الغريبه وضع بعض اللوائح البسيطه للمفهوميه ..

. ف سطوري لمن يعيشون بهذه الشوارع .. للماره .
فأنا أدون كلماتي للذين يسيرون بهذه الشوارع .. ولن أطرق ابواب البيوت ..
ولن أتجرأ بدخول المعالم المحرمه .؟؟

.. إنني صبوره كل الصبر وحالمه كل الحلم ..
بأنه لربما بعد سنين قد يصل كتابي لمن هم بحاجة لفهم العالم الذي يعيشون به أكثر .. .
يفهموا الحياه بوجهه الصحيح ...
...
إلى كل من يعبر هذه الطرق لك كلماتي . من أحداث حقيقه لم أحرف بها كلمة واحده .
من شخصيات أعرفها من قريب .. او تحدثت معها .. وبعضها تشرفت بالسلام عليها .......................
..........
روايتي ليست لها بطلات أو أبطال .. فكل واحد يتحدث عن نفسه .
ولن أضع تجارب كل من بروايتي بالناجحه .. ولن اخرجه برونق السينما .
أو اجعله مثل نهايات الأفلام الهنديه .. ..
....... اتحدث عن واقع شاهدته وعاصرته في حيااتي ..شخصيات اعرفها جدا ..
فأنا بسيطه كل البساطه أحب التعمق في كل شيء ..
.............
..................................


الجزء الأول ..

مكه أرض العفه والطهاره .. الحرم ملاذ الجميع بخطوات ثقيله سارت أم نافع وإبنتاها هناء و سلوى الى بوابة الحرم وقد شاهدوا الحرم أخر مره قبل 13 سنه .

وإذا بها أم نافع : يالله يا كريم شوفوا يا بنات مكة كيف تغيرت .. يا سبحان الله أذكر أخر مره يوم إعتمرت مع أبو نافع كان كل شيء غير ..
تذكرين انتي يا سلوى وقتها كان عمرك ...

سلوى ..أدري يمه كان عمري 10 سنين ..
حافظه هالموال الي كل مره تقولينه لي خلاص . درينا أنا الأكبر ..
صار لي 4 أيام بمكة وكل ما ندخل الحرم تقولين نفس الموال .. يوم كنتي و يوم كنا ..

هناء : تقرص سلوى .. شوي شوي على أمنا خليها تاخذ راحتها بالحكي ..
سلوى : منتي شايفه مأخره سفرنا عشان تنزل الحرم . صار لنا أربع ايام واليوم الخامس . متى نسافر ..!
ماري : تعالي خذي عصا ماما بسرعه .

نزلت أم نافع عند مغاسل زمزم تريد أن تستغل جل وقتها للتقرب الى الله .
فها هي تاره تشرب من ماء زمزم وتاره أخرى تضعها على جسدها إنها البركه .
والشفاء من الأمراض . وها هو مؤذن الحرم ينادي حي على الفلاح حي على الفلاح قد إقامة الصلاة قد إقامة الصلاه . الله أكبر الله اكبر لا إله إلا الله ..

أم نافع ..هناء بنتي . ماري تعالوا اسندوني نطلع فوق نصلي .. . يالله يصلي فينا الشيخ الشريم . ينشرح صدري لما أسمعه..
هناء : يمه وقفي هنا .. أم نافع . الله يبارك فيك يا هناء
السلام عليكم ورحمة الله السلام عليكم ورحمة الله ...
سلوى : يالله نمشي للفندق البنات أكيد وصلن.

الموذن : ينادي الصلاة على الأموات يرحمكم الله ..
أم نافع : اصبري خلينا نصلي ناخذ الأجر يا سلوى . وإلا إذا انتي مستعجله روحي يمه .
وهناء وماري قاعدين معي ..
هناء : يمه خذي راحتك احنا قاعدين معك . روحي شوفي البنات يا سلوى .
سلوى : لا خلاص بنتظركم يالله صلوا .
ماري : ماما سلوى ليش انتي مافي صلاة !
سلوى : اسكتي ما عاد إلا الخدم يتكلمون ..
........

.. هنا ذهبت أم نافع وبناتها مع الخادمه الى الفندق . وما أجمل إطلالة هذا الفندق على الحرم المكي . ..

أخذت سلوى تسبق الجميع واعتمدت على هناء والخادمه لمساعدة والدتهم حتى يصلوا الى الفندق ..

سلوى : ألوا .. وينكم .. أجل نتقابل عند الأصانصير ونطلع كلنا سوا ..
سلوى تنتظر بنات عمها .. أريج . تهاني . أفنان .. جاين من جده وها هم بطريقهم لمكة ...

.. ألواا .. ها وين الي يقولون خمس دقايق وتلاقينا قدام الأصانصير ..
من جدكم بالله كم باقي و توصلون..
لو سمحتي شوي ...!! (( صوت ثقيل .. صوت رجال ))

وعلى طول صوت سلوى صار ناعم هادى خفيف . مليان بالدلع والأنوثه ..
اوكي عمري يالله لا تتأخرون أكثر من كذا ...
و وخرت من قدام الأصانصير عشان تسمح لهذا الرجال يدخل ..
وأخذت تحدث نفسها تقول .. يالله بس شموا ريحة العود .. ..
بس قهر ما أمادني اشوف شكله !!

أوف عليكم يا بنات اسمعي يا افنان أنا بطلع فوق والله شكلي مره غلط رازه نفسي قدام الناس كذا لوحدي ..
أفنان : سلوى اطلعي لأن شكلنا صدق بنتأخر أكثر .
سلوى : وجع كان قلتي من قبل ( شغاله عندكم أنا )
يوه فشله بعد كل هالإنتظار أطلع فوق كذا ويش يقولون الناس ..

وصلت سلوى للجناح ... ألوا . هلا هناء .. اي انا بالشقه قاعده من وقتها أنتظركم .
وإنتوا بعد وش الي مأخركم .. امي صح ..!!
الله يحفظها لنا يا رب .. أها .. زين .. ليه مين جاي معكم .. ؟؟
مين هذي ؟ طيب يصير خير..

أسوتين .. أسوتين .. ماما طالعه الحين ومعها ضيوف جهزي كل شيء ..
عشر دقايق وإذا بهناء وأمها والضيفه يدخلون الشقه .

ام نافع.. يالله يحيهم هلا والله يا هلا وألف مسهلا . حياك حياك . تفضلي ..
لا والله تدخلين .. تفضلي ..

هناء وبكل ادب .. تقول عبايتك يا خاله ...
سلوى : هلا والله يا مرحبا .. وتسلم ..

سلوى تجلس بجانب هناء ..
سلوى .. مين هذي ؟؟
هناء : والله علمي علمك .. وحنا طالعين من الحرم شافتها أمي وسلموا على بعض و شوي تقولي دقي على سلوى عشان تتأكد ان الضيافه جاهزه ..
سلوى : يعني ايش نقعد ولا نقوم ..
بس هذي شكلها اصغر بكثير من امي وش الي عرفها بأمي .. ؟

أم نافع : يا هلا بأم عبدالمحسن .. ما بغينا نشوفك زي ما أنتي ما تغيرتي . وكيفه أبو عبدالمجسن .. عساه طيب ؟

أم عبدالمحسن : والله بخير .. ما غير طول وقته بهالبر مدوخنا .. يا مسافر باكستان أو جزائر . يا السودان ..
وانا جايه أخذ عمره وانشاء الله مسافره بكرا الفجر ألمانيا .. وبقعد فيها يومين وطالعه لندن .




الجزء الثاني ..


أم نافع : هذي بنتي سلوى الكبيره تدرس علوم سياسيه أخر سنه لها
وهذي بنتي الصغيره هناء سنة ثانيه هندسة ديكور
ما قلتي لي أم عبدالمحسن كيف صحتك والعلاج انشاء الله أحسن.

سلوى : تفضلي يا خاله تبخري.
أم نافع: يوه السموحه نسيت عندك حساسيه من البخور
يوه السموحه نسيت عندك حساسيه من البخور
.. سلوى بنتي خذي البخور داخل .

__ وهنا دار حديث بين هناء وأم عبدالمحسن
. عن الدراسه وعن قسمها هندسة ديكور
وكيف انا هناء فنانه تشكيليه أقامت معرضين الأولى في الحي الدبلوماسي في الرياض والأخر في الملحق الثقافي في السفاره السعوديه عند إحتفالهم باليوم الوطني السعودي في عاصمة الضباب لندن .


تعجبت أم عبدالمحسن من أسلوب هناء الراقي الهادئ البشوش المائل الى البساطه أحيانا والى الثقه بالنفس مرة أخرى ..
في هذه الأثناء دخلت بنات عمهم
. أريج , أفنان , تهاني ..

أم نافع ..: بدأت تعرف صاحبة السمو على الداخلات هذيله بنات عمهم .
أريج رابعه جامعة قسم مكتبات .
أفنان ثالث ثانوي ( أدبي)
تهاني مع بنتي هناء ( قسم هندسة ديكور )

ما شاء الله الله يحفظهم .
أجل قلتي لي انك فنانه تشكيليه ( ام عبدالمحسن ).
ما عندك صور لأشغالك ما فكرتي تسوين معرض بجمعية النهضه الخيريه ؟

هناء ..إلآ عندي صور وعلى فكره أنا أرسم بعد
.. ( تضحك هناء ) يقولون رسامه بعد
.. وأكتب شعر وخواطر وو
على قولة المصريين . ( بتاع كلو )

أم نافع
. والله انك قاعده عندنا اليوم وعشاك معنا
. لا والله انتوا الي طالعين معي فوق وخلونا نسمر سوا أنا مجهزه شنطتي لسفر يعني فاضيه ومنها فرصه نسولف ونضيع وقت
.. يالله عن اذنكم انا طالعه والكل حياكم عندي ..

أم نافع : والله كان الود ودي تقعدين عندنا بس ما أردك انشاء الله ..

وبالفعل قامت أم نافع وبناتها مع بنت عمهم أريج وأفنان بزيارة أم عبدالمحسن وكانت سهره رائعه تتخللها الكثير من الذكريات الجميله عن الماضي
. وكيف تعرفوا في رحلة العلاج خارج أراضي المملكه في ألمانيا وبعض المواقف الطريفه التي إلا الأن يذكرونها


. وفجر تلك السهره الجميله سافرت الى ألمانيا على امل اللقاء مجددا بذكريات جميله عن شبابها مع صديقتها
.. وهي التي لاتزال في رحلة علاج مطول لمرض مزمن تشتكي منه وقد أخذ من صحتها الكثير .
في الدور التاسع رجعت البنات وكل واحد منهم سعيده بالقصص الجميله التي سمعنها والمواقف الجرئيه ..

أخذت سلوى تردد على مسامع والدتها .. اي وتقولين احنا أول كنا كذا وكذا .
ولو ما شفنا صديقة الدرب كان لا درينا ولا انفضحنا واخذن يضحكن .

اريج : كله بجهة وقصص هالأمراء بجهه ثانيه .. شفتي وش قالت عن ........ ال سعود .. ولا .......
يالله مره وناسه قعدتها تهبل

أفنان .
.. تدرين عمتي صدق الي يقولون لا أحد ياخذ فكره عن أحد قبل لا يقعد معه .
أول ما شفتها ما ارتحت لها .. بس بعد القعده شفتها مره طيبه ..
معي صديقتي تماضر .
. . ال سعود .. و نجديه ... ال سعود ... كلهن يهبلن صديقاتي حيل...
بس تعالي شوفي هالمرافقات هههههه كأنك تقولين هي الأميره والعكس صحيح .

هناء . تدرون وش الي عجبني بالسهره اليوم قصص أمي ..

وهكذا مع تبادل أطراف الحديث دخلوا الى الجناح وكل واحده منهم تتحسر على تهاني كيف أنها قد أضاعت على نفسها سهره رائعه مثل هذه والضحك والصوت العالي تكاد ان تخرق أذان تهاني .
وبعد أن انتهوا من الحديث أخذت كل واحده تلومها لعدهم مرافقتها لهم
... وهي تنتقل بنظراتها ما بين سلوى وهناء . وأخواتها أريج وأفنان ..
تهاني .. بس خـــــــــــــــــــلاص .
خلصتوا .
أخذت تضحك بشده وتقول عادي عادي ومن قالكم اني كنت لوحدي . .؟
وعلى طول ارتمت على سريرها هناء
. والله تقولين وش سويتي .

لآلآلآلآلآ موتوا .. والله ما تطلعون مني كلمه واحده ..

البنات جميعا .. ..
صدق انك سخيفه يالله تكلمي اش صار ..؟

تهاني ..لالالا و الله ما أتكلم لين ما توعدوني نطلع بكرا جده نفطر هناك في ستاربكس الساعه 9 صباح وبعدها أقولكم ..


أفنان : قولي انك مجنونه هبله مضروب راسك
. شوفي الساعه الحين 4 صباح
. متى ننام . متى نقوم والى متى نطلع من مكه ..
وتبين تفهميني ان عمتي بتوافق !! اقول بلا دلع يالله قولي .

تهــــــــاني :: أجل ضفوا وجهكم وبرا بكمل نومي يالله برا .

سلوى ( بخبث وصوت هادئ )
شوفي فطور وبنفطرك وجده بنوديك بس والله لو سالفتك طلعت سخيفه و زباله زي شكلك
.. وربي قدام كل الناس أيس موكا على راسك
(( ها بنات اتفقنا ))

أوكي اتفقنا


Mar00m غير متصل  
قديم 07-08-2008, 01:49 PM   #2 (permalink)
Mar00m
رومانسي مبتديء
 
الجزء الثالث ..

نرجع الى البنات ..
وبعد الفضول المميت من البنات لمعرفة ماذا عند تهاني ذهبوا الى ستاربكس مغامرين الطريق وعدم معرفة أم نافع بذلك وفضلت هناء الجلوس مع والدتها تفاديا لأي طارئ ..

الساعه الأن الثامنه والنصف صباحا في مقهى ستاربكس ..
سلوى أفنان أريج وتهاني ..

لا أعرف لماذا حينما أتحدث دائما أبدأ بإسم أفنان لربما نعرفها أكثر في السطور القادمه ..
وبعد طلب كل واحده منهم ..
أول ما تحرك الجرسون .

أريج : يالمالحه ما طلبتي غير ايس موكا ع الصباح يا سلوى ..
سلوى : عادي يا عمري أنا حاااااااالفه .. وتمد الألف ..
أريج ..لا يطلع روحك بس .. وش حالفه عليه.!
سلوى ..حالفه هذا على راسك اختك تهاني اذا سالفتها طلعت زي وجهها .
. وخلتنا نطق مشوار عشان سواد عيونها ..


أريج.... يالا تهاني تراك مسختيها يالا علمينا .وش سالفتك .
. الي على اساسها ماسهرتي معنا عند أم عبدالمحسن ........؟؟

تهاني :قولوا لي كلكم .. من الي كانت تقهرنا بحياتنا ؟؟
ما فهمنا وش تقصدين ؟؟
يعني لما كنا بالثانويه أيام مدارس الرياض ..... مين الي كانت تستفزنا بحركاتها ... !!
تهاني : طبعا أنتي يا أفنان اتوقع ما شفتيها بس سمعتي عنها
تعرفين حضرتك للحين في الثانوي ..

والبنات كلهم بصوت واحد لا تقولين .....
بدريه .... !!
بدريه ال .........
إي إي .. بدرية النجدي .
طبعا تعرفون حركاتها اش كانت تسوي مع البنات مستفزه لأبعد مما تتصورون ..
يقولون تغيرت الحين ..(( والله أعلم )).

كلمتني بدريه البارحه ..
وقعدت تسلم وتسأل عنكم وحده وحده ...وتقول مشتاقه .. (( تتمصلح )) ..

إي وبعدين ....!!

وقعدت تسولف عن نفسها والغبيه قاعده تقول سوالفها الخاصه ..
إنها عرفت فلان وتركت ذاك ...المهم تخيلوا بالنهايه رست على مين ؟؟؟؟؟؟؟؟؟؟؟؟؟

أخو منتهى .....
...... وتبي مني رقم منتهى .
. وفهمت من كلامها إنه في مشاكل بينها وبين أخو منتهى ..

سلوى
: يعني بدريه الحين على علاقه مع أخو منتهى العنزي ................. منصور ...؟؟
منصور العنـــــــــــــزي ....
مستحيل ........... كيف عطاها وجه ؟؟

اسمعوا باقي الكلام .. بدريه ..تقول إن منصور غير رقمه وعرفت تجيب رقمه من واحد من أخوياه !! واتصلت عليه تبي تصلح الموضوع .........!!
طبعا منصور قعد يصرخ وهزأها وقالها كلام جارح .. وقفل السماعه بوجها...؟

زبدة الموضوع .
قلت لها يصير خير بعطيك الرقم بس اهم شيء أستأذن من منتهى ..
دقيت ع منتهى وقلت لها كل السالفه .
طبعا منتهى ما تدري إن بدريه تعرف اخوها .بس تذكر بدرية أيام الثانويه بس ..
طبعا انا علمتها بكل شيء .. قلت لها كل سوالف بدريه من أيام الثانوي لين ما دخلت الجامعه ..
و زودت عليها بعض البهارات.

إنجنت منتهى ... ؟

إنجنت منتهى
وأخذت تربط الأحداث مع بعضها . واستنتجت لماذا حينما كانت تذهب برفقة أخاها منصور إلى أي مكان تجد بالصدفه بدريه أمامها ؟؟
أها يعني كذا ... شوفي يا تهاني ..
بما ان اخوي منصور مخبي على الموضوع انا بكمل السالفه وبسوي نفسي ما اعرف شيء!!
(( لكن تكفين طلبتك خذي رقم اخوي وقولي له إنك فاعلة خير )) ..
وعلميه بإلي علمتيني ..
بربك يا تهاني ..!!
منتي خسرانه شيء ..
بالعكس تكسبين أجر .أخوي وأعرفه متسرع بشكل غريب .وأخاف يبي يرتبط فيها ؟
ويقعد يضغط علينا .
شوفي الأشكال هذي ما تناسبنا أبدا .....

أريج : بربك يا تهاني لا تقولين دقيت عليه وسمعتي كلام منتهى ؟؟
تهاني : لا والله تعالي علميني وش اسوي بعد ؟؟
أي طبعا دقيت عليه ...........................................!


المهم تعالوا اسمعوا الصوت صوته والله هزني !! قهر شوفوا منتهى من متى نعرفها !!
ولا درينا إن منصور العنزي أخوها ..
إلا بعدين ..؟؟ صوته يا بنات ..أهـ صوته ..فز قلبي ..
تدرون لما تحسون بلحظه ان الي قدامك هذا شيء ثاني
تعرفون طبعا الصوت الملكي هذا . الثقيل الي فيه بحه غريبه وهو يتكلم
. .. أهـ بس ..؟

دخلت عليه عرض .. طبعا صوتي ما يبي لي منازع ..

قلت له : منصور العنزي ..
قال: هلا
بعد اذنك أخذ من وقتك اذا انت فاضي .. ؟
هلا اختي تفضلي ..
أخوي منصور : وقلت له كل شيء .....
بس تدرون القهر وين ........... حسيت انه تقريبا يحبها .......
يعني وانا اقوله السوالف حسيته ماهوب مصدقني .. ؟
وقعدت فتره اقعد اقنع فيه .. وقاعده اقوله ترى اسمها ضمن أخر لسته لبنات الرياض .. ؟
تخيلوا وش قالي ..!!

قال أي لسته هذي حق أي شهر ..؟
أخر أربع لستات أنا اعرف الي كتبها وكنت معه لما نزل اللستات ..! ما قد قريت اسمها ؟؟
على طول طلعت من السالفه حسيت انه شك اني كذابه ....
وقلت له : لا هذي لسته خاصه فينا حنا البنات ما نطلعها للأولاد
.. وبعدين هذا العلم الي جاك وبراحتك اخوي صدقت ولا لآ وهذي حياتك أولا وأخيرا ..

مشكوره ما قصرتي اختي .. ويعطيك العافيه .......

سلوى: الحين بس قالك كذا مشكوره ما قصرتي ....؟؟
تهاني : إي ..........
سلوى : الحين انتي بالله هذي سالفتك الي مطلعتنا من مكه على وجيهنا لأجل سالفه غبيه زي الي قلتيه ..
.. وسالفه لا تودي ولا تجيب .... ومبسوطه بعد .. والله انك ماااااااالحه ..
ودمك ثقيل .. أدري أشكالك انتي يا تهاني هذا حدهم . كلمني وكلمته .. وقالي وقلت له ..

تهاني :
يوووووووه الحين لما يكون معي رقم منصور العنزي .
هذا الي كل البنات منهبلين عليه .. وأنهيت علاقته مع بدريه النجدي سواء هالأيام او بعد كم شهر . واضح ان العلاقه انتهت ..!
صدق ما تنعطون وجه ......... هذا منصور يا غبيات .. هذا منصور العنــــــــــــــــــــزي ..؟
Mar00m غير متصل  
قديم 07-08-2008, 01:50 PM   #3 (permalink)
Mar00m
رومانسي مبتديء
 
الجزء الرابع ..

(( للمعلوميه الروايه مترابطه .. وحقيقيه .. عن أحداث رأيتها . وبعضها سمعت بها من الأشخاص نفسهم .. أتمنى أن أكمل الروايه الى الأخر .. ومنحي فرصه وضع الجميع على أرض الواقع .. والخطوط الحمراء .. ))

بما أنني تحدثت قليلا عن البنات . أريد الأن التحدث عن الشباب .. وعن حياة منصور .. ؟

ننتقل الآن الى الذكر ..
الى أجواء الرياض .. هذه المدينه التي بها الكثير ثم الكثير مما نجهله أو لربما أغمضنا ابصارنا لكي لا نراه .
الرياض .. وما أدراك ما الرياض ..!! بؤرة من بؤر الفساد الباطني..
... كل ما تريده كل ما اردته ..بطريقة شرعيه او غير شرعيه .
ولماذا أخطو خطواتي هذه إلا لثقتي الكامله بأنني ألتقط انفاس الكثيرين ممن يعرفون ما اعرف ؟؟ .
ويرددون ليتها لا تذكر هذا المكان .او ليتها تنسى او تتناسى هذا الجناح او ذكر هذا الأسم ...؟

هنا __اجد نفسي مرغمه ان لا اذكر بعض الأسماء الحقيقيه و أجمع ذاتي واقول
(( من ستر على مسلم ستر الله عليه ..))


هناك بإحدى التجمعات السكنيه ( مجمع الحمرا) التي تعج بالأجانب من جميع الجنسيات ..
غالبا ما يتردد منصور على هذا المجمع ويقضي اوقات ً مطوله برفقة صديقته نادين فهي من سكان هذا المجمع ..
أخذ منصور يتحدث في هذه الليله وبكل صدق مع نادين انها صديقة الطفوله .
نادين التي لطالما كانت تستمع له كأخت وصديقه وناصحه .
الكل يشهد لنادين وقفاتها الجريئه معه .وكيف لا وهي التي دائما كانت تردد .. ربي لم يرزقني بأخ لكن أنت اخي يا منصور ... !

نادين وبلهجتها اللبنانيه ....تردد منصور منصور .
.. وتردد والله مو شايفاك على بعضك يا منصور .. شو بك ؟؟
منصور.. عادي مافيني شيء ...يعني لازم اتكلم واذا سكت يعني زعلان قاعد افكر شوي ..
.. عن جد , في شو ؟

منصور.. اسمعي ولا تقطعيني زي عوايدك وما ابي أي تعليق لين ما اخلص من كلامي
..قولي وراي .اخوي منصور اتفقنا ماراح أقاطعك بالحكي....
نادين .... إي ولو ..اكيد اتفقنا ع عيني وراسي ..


منصور.. أجل إسمعي انتي تعرفين وش كثر بنات عرفت بحياتي وكلهم كانو مجرد لعب تسليه..
من اول بنت عرفتها وانا بأول ثانوي لين هاللحظه وانا قدني تعديت ال 28 سنه
وانا والله
ثم والله كنت مره صريح مع هالبنات أقول لكل بنت اعرفها من البدايه اسمعي انا مانيب راعي زواج ........!!
يقولون ندري والعلاقه تمشي شهر شهرين بعضهم سنوات.
وتدرين تسلية وقت والغرض معروف بالنسبة لطرفين.وإذا مليت من وحده في ثانيه وثالثه ورابعه ..

تدرين البنات كلهم عندي سوا جنس واحد ,هطفات .خفيفات .يمثلون لأبعد الحدود ..

منصور ..
.. نادين .............. ليه تبكين ..؟؟
الله يهديك هذا وانا اقول انا اخوك واخذ راحتي وانا اكلمك
..خلاص خلاص مانيب مكمل كلامي ولا امسحي دموعك ..

نادين .. لا يا منصور ..انا حسيت بلحظه انك بتحكي عني و انك ما بتثق حتى فيّ انا اختك هيك لا شعوريا بكيت ..

منصور.. يا الله عليك انتي ..
قايل صغيره وتتدلعين وانا اقدر هذي انتي نادين عيوني الي ادلعها واخاف عليها ولا كييييييييييف

.. تبتسم نادين ..طيب كمل الحكي بدي اسمع ..

منصور ..اوكي نكمل .
أي تدرين وفوق هذا كله يستغلونك في كثير من الأحيان ..
وكل هذا وانا ادري ان هذي تستغلني او هذي تحاول تسوي نفسها برئيه ولا غبيه .
بالإجماع كلهم عندي وانتي بكرامه ما يسوون نعالي ...

وهذي فكرتي عنهم .وبحياتي ما غيرتها وما عندي استعداد اغيرها .حتى الوالده تقولي اعرس بنزوجك
.. اخاف من بتكون زوجتي!! .. شكلها وحده من هالمنحطات الي عرفت قبلي عشر !!
وجات تستر على نفسها بأخر لحظه معي..

.. ما اختلفنا تحب واحد بصدق الحب من الله بس لا تضحك على عمرها وتحب عشر وتيجيني .تدرين الموضوع هذا مسوي لي قلق انا فضلت اكون عزوبي ..
.......

نادين .. ول ول ول

. شو كل هالحكي والحقد الي فيك .
. يا عيب الشو وووم لا يا منصور ما ينفع هيك والله ..واحكي لي انا شو دخلني بهالكلام
داخل عم تسب وتشتم بهالبنات .. شو يا عم . .. شوي شوي علينا
Mar00m غير متصل  
قديم 07-08-2008, 01:51 PM   #4 (permalink)
Mar00m
رومانسي مبتديء
 
الجزء الخامس ..

أجواء الشباب . ..
قعدات القهاوي .. سهرات الليالي .. جمعات الإستراحات و البحر .. تجمعات هؤلاء الشباب ..... كانت دوما وأبدا
فضول أي فتاه .. ؟
فضولنا القاتل الذي أوصلنا الى ما نريد . معرفة المجهول ..العالم الأخر ..
العالم الذي طالما سمعنا عنه .فكثيرا ما تردد أمي ...
..... احذري هذا العالم لا تقتربي من هذا المجهول ..
هذا المجهول الذي نعيش معه ونحبه ونتزوجه لكن لا تقتربي منه كثيرا
فهو عالم خاص عالم غامض عالم مرير ..

.. تذكرت صديقتي حينما قالت لي ذات مره ..
أنها اخذت كاميرا ووضعتها في استراحة خاصه بهم فقط لكي تشبع فضولها من هذا الرجل فهي تريد ان تعرف كيف يجلس ..
كيف يأكل .. مالذي يتحدث عنه ..
كيف يمسك هاتفه وما إلى ذالك !! ..

ما أجمل ان نعرف كيف يتصرف الشخص الذي نحبه في غيابنا . .!!
.. هنا سوف نسمع سطور وحروف من الوفاء الأبدي
.. ناهيك عن الوفاءالجسدي والحسي ؟؟

هذا الفضول . الرجل الذي اشعله بنا غموضه في هذا المنزل جعلنا ننتهز الفرص حتى نعبث بخصوصياته اكثر .. وأكثر .. وأكثر ..

نادين ما تنفع ردد منصور هذه العباره كثيرا وقال لن تفهمني نادين ..طبعا هي فتاه مثل أي فتاه تنجذب الى الجنس الناعم و مهما قلت لها لن تفهم هذا البيت من القصيد ..
منصور . يالا انا ماشي .تامرين على شيء .. بروح اشوف ربعي ..
نادين .. وين لكان .. بدري والله ما اقعدت ..
منصور . لا . صدق متأخر ابي اروح .يالا اشوفك بكرا اذا قدرت ..فمان الله .

.***
على مشارف الثمامه استراحه شباب نجد , هذا المكان الذي يتردد عليه منصور و أصدقائه دائما ..
منصور متعصب لبني جلدته فهو نجديِ حتى النخاع , متعصب الى أخر خليه بجسده ..
وكثيرا ما يترك الجلسات بعد الشد والجذب لموضع تعب الجميع من مناقشته مع منصور القبائل .. ودائما ما يردد المقوله الشهيره له .. نحن شيوخ الجميع
.. حنا العنوز ( العنزي )

.. فيجلس يحكي لأصدقائه قصص القبائل والخصومات بينهم ..
والأراضي التي نهبت وسلبت .. والحلال الذي أخذ من فلان والصكوك الموقوفه والى ماااالا نهايه ..
واحتراما له غالبا ما يقبلون كلامه بصدر رحب لأنه قريب من الجميع ..
ولكن حينما يتمادى يجد ان الكل له بالمرصاد !!

... من يجلس مع منصور اول مره , يخيل إليه أنه ذات تفكير واحد ..
.. شخص متعصب فقط لا يعرف في هذه الحياه غير القبائل , الشعر , الصحراء , وأنه شخص بسيط ..
غير أنك لو عرفت منصور على حقيقته فعلا .؟..

منصور المتفتح على ابواب هذا العالم فهو من الطبقة الأولى ..
للأسف يقال لهم في الكويت أصحاب الجنسية الأولى .
فهو متحرر من كل قيود التحرر فها هي صديقته نادين صديقة الطفوله لبنانيه الجنسيه .
لكن حينما تتحدث عن الوتر الحساس النسب تستطيع وقتها أن ترجع وتقول ان منصور متعصب .. ؟

... وها هو يمرح ويلهو ويسهر ويسافر ويتسكع كأي شاب , تربيته منذ طفولته في باريس أكسبته الحريه بطريقة أخرى, فهو يرى أن الصداقه لها مفهوم أخر .
نعم في قانوني انا يجوز للفتاه أن يكون لها صديق لكن لا أريد لأختي أن يكون لها صديق ..!!

اسرة منصور تسكن في باريس منذ أوائل السبعينيات , فوالده ذات رتبة عاليه في الملحق العسكري للسفاره السعوديه في فرنسا .. درس الى المرحله الثانويه في باريس وبعد ذلك انتقل لدراسة الجامعه في الرياض ولوفاة والده فكان ملزما منه ان يكون مع عائلته في تلك الفتره ..
Mar00m غير متصل  
قديم 07-08-2008, 01:52 PM   #5 (permalink)
Mar00m
رومانسي مبتديء
 
الجزء رقم 6 ..


دخل منصور الى استراحته المفضله استراحة شباب نجد
.. وجلس في ركنه المعتاد بعد أن سلم على هذا وذاك ,
منهم من يلعب البلوت وأخر يشاهد التلفاز ومن يتحدث بالتليفون ..

ولكن دائما مع دخوله الكل يبدأ بالإلتفاف إليه ليسمعوا ما الجديد لديه منصور و مغامراته

ومما أكسب منصور شهره واسعه بين البنات. ........
وسامته ...
فهو طويل ذات قامة عريضه... مفتول العضلات..
لونه الأبيض المائل الى الأحمرار يخيل إليك للحظه أنه لربما تعرض لشمس واكتسب هذا اللون البروزني , لديه ابتسامه جذابه جدا

..ودائما حينما يبدأ بمحادثه فتاه لم يتسنى لها معرفة شكله !
.... وتسأل سؤالها المعتاد ..يعني كيف شكلك ؟؟
يرد منصور وبثقته الزااائده . تقديرين تقولين عندي نظره حاده
... نظرات منصور قاتله .. نظره لا تستطيع أي فتاه مقاومته
.. نعم إنه الرجل الذي نريد ..

وبصوت عال تحدث الوافي
. هلا والله ..أبطيت علينا يا منصور ما بغيت تيجينا ولا صديقتك اللبنانيه خذتك منا واخذ يضحك ..

اقترب الجميع .. يتقدمهم الوافي ويجلس بقرب منصور ..
أصدقاء منصور المقربين هم الوافي و هتان وهم من أبناء قبيلته ....
و خالد صديق المراحل الجامعيه من مدينة حائل ...

أخذ الجميع يتحدث
. ويضحك وبدأو اللعب من جديد
... الشطرنج لعبة منصور المفضله
والكل يتراهن ان خالد قد اكتسب خبره ليست بالقليله في هذه اللعبه

.. يالا نبدأ نلعب شباب ..!
ضحكات الشله هذه عاليه لدرجة تتخيل أنهم لربما في عراك او شجار تكتشف أنهم يضحكون
.. ويتناقشون ويردد الجميع
.. يالا يا منصور ترد هالشمري شكله بيفوز عليك .. يالا يالا وين الملك. وين .. ؟
جولة أخرى ويفوز خالد على منصور ..
يستحق خالد هذا الفوز .. ..
نعم فاز خالد بهذه الجوله .

ضحك منصور
.. إي علمته الرمايه فلم اشتد عوده رماني
.. والله منت سهل يا خالد ..لالا تدري انا الي ما مزاجي ما كان رايق وإلا كان فزت عليك ..

خالد ..وأنا أخوك
.. اقول لا تضحك على روحك فزت عليك وبجداره بعد ..
يالا رح العب بعيد


تلقى منصور مكالمه وانسحب الى ركن المجلس ليتحدث براحته اكثر ..
وبدت عليه علامات الغضب
.. وأخذ يحرك يده وكأن الشخص الذي يتحدث اليه أمامه
.. و قبل أن يقفل الخط وينهى مكالمته رفع صوته أكثر فسمع الجميع ماذا قال
.. وأقفل الخط ..وبدأ متوترا جدا

الوافي ..من بعيد وبحركة يده اشار له ..
بمعنى ماذا بك
..... ترى مافي شيء يستاهل زعلك والله ؟

.. تقدم منصور .. وبعفويه سأله خالد ياخي وش فيك ؟عيب كذا .ترى هذي بنت ناس
..تقعد تذلها وتصرخ فيها
.. والله ما هقيتك كذا يا منصور ..
ياخي إتركها بس لا تهينها بالطريقه هذي ..
وش ذا الكلام الي سمعناه منك .
والله ماهوب كلام رجال ؟


منصور .. أقول يا خالد إذلف من قدامي ما ابي اسمع منك شيء,
وخر بس
.. وأخذ يتمتم ويشتم ؟؟

خالد .... منصور احترم نفسك مانيب اصغر عيالك ..
ثمن كلامك ...

وبدون أي حسبان ....
حصل خلاف حاد بين منصور وخالد وبدأ الإثنان بالشتم واللعن وقول وألفاظ بذئيه
.. وفتح صفحات قد طويت بينهم...............؟؟


حاول الجميع أن يوقفوا هذا الشجار . لكن تمادى الأثنان كثيرا ..
ومما زاد الطين بله
.. حينما قال منصور هذا إنتوا الي ما عرفتوا تجيبون حلالكم .........!

هنا أخذ
خالد بضرب منصور ......؟؟لولا تدخل الأصدقاء لكان هناك قاتل ومقتول ؟؟

خرج منصور من الإستراحه وهو في شدة الغضب ..
ويلاحقه الوافي ..
ويحاول تهدأته وأخذ يسوق سيارة منصور بدلا منه كما هو معروف أن منصور ذات سوابق بحوادث السيارات
..؟ ..

.........
Mar00m غير متصل  
قديم 07-10-2008, 10:38 AM   #6 (permalink)
Mar00m
رومانسي مبتديء
 
الجزء رقم ( 7 )
الجزء السابع .


الى الأن نحن في أجواء الشباب . .. أضحك حينما أردد المقوله . أغلب مشاكل الشباب .. على البنات .. او لازم في خيط بسيط سببه بنت ..
ولسوء الحظ انه بالمثل عند البنات ..

.. بعد حادثة تلك الليله ... بين منصور وخالد .. وببطء شديد حاول الأثنان نسيان ما حصل . .. لكن هناك ضغينه مخفيه من منصور تجاه خالد ..
تحدث الوافي الى منصور ..

الوافي : منصور ياخي انتوا الأثنين اخذتوا حقكم بالكلام . خلاص ياخي فكنا من سوالفكم هذي . ترى منتوا صغار .. لين متى هالتعامل الجاف الي بينك وبين خالد .

منصور ... .. انت تعرف وش كثر ثقتي فيكم كلكم وبالذات في خالد ..هذي صديق السفريات وفوق راسي .. بس تعرف ليه انا شديت وغلطت عليه ..
اكيد كلكم تعرفون اني وقتها كنت اكلم بدرية النجدي .. والي انا مستغرب منه هذي من وين جابت الرقم . انا كل شوي اغير رقمي وألاقيها ناطه جايبه الرقم ..؟
تدري مين يعطيها رقمي ؟؟... خالد .. وأنا ما أحب احد يتدخل في علاقتي مع البنات ..
وافي.. البنت هذي انا ابي انهي علاقتي فيها . خللآلآلآلآلآلآلآلآص افهموني . البنت ما تناسبني ..

منصور ..افهمني . يا وافي هذي
بدريه عرفتها من سنتين والبنت زينه وما عليها .. خلاص صار بينا خلاف ..تعرف لما تحس ان الي قدامك مره وبزياده طيبه .. لدرجة الغباء إذا قلت لها ..

قطي نفسك من البلكونه ترمي بنفسها .. وأنا اخوك الصنف هذا مستفز مره ..
تسمع كلامك فوق العاده . مافي نقاش مافي بهارات ..
الشاهد ربي انها معطتني كل حقوقي .. لكنها لصقه .. لحوحه .. والله أحيانا لما تدق على الجوال وتحن
ودي أخذه وأكسره على راسها .. تغثني بمسجات .. وينك وينك ؟ ليش ما ترد .. ؟
اكيد انت فاهمني .. صنف يزهق ..
أدري انها تحبني إلا بتعطيني عينها بعد .. بس أنا ما ابي كذا ..

الوافي .. والله يبي لك وحده بالجزمه على راسك ..

منصور ... يضحك . لا ماهيب لدرجه هذي .. زبدة الموضوع بعد اتصلت وحده وحذرتني من بدريه وقالت لي اشياء واجد عنها . وانا داري ان البنت هذي كذابه وتبالغ ..لراسها .. لآني اعرف بدريه زين .. بس سويت نفسي شبه مصدقها في بعض الأشياء .. وقلت لها انا بشوف الموضوع وقفلت منها ..

.. منصور ..بس تعرف يا وافي .. لما يجيك احساس ماقد حسيته .. أحيانا انك منجذب او معجب بأسلوب وحده ودك توصل لها بأي طريقه .. هذا انا ...
شف البنت دقت من ثلاث أيام وانا ميت وأكلمها .. الود ودي أرجع وأدق .. والله حاس اني ميت .. فضولي ذابحني ..

الوافي . ياخي وش هذا من مكالمه . سوت فيك كذا ..
اضحك على غيري ... ياخي ما تعرفها .. وش دراك جايز متزوجه . مخطوبه . ولا تحب أحد ... ليه انت متسرع بهالسالفه ما قد خبرتك كذا
أعرف طول عمرك قلبك بين يدينك ..

منصور .. لا لا . شف انت تعرفني أنا لعاب . ومافي أسوأ مني بالسوالف هذي .. مدري كيف أوصلك مشاعري . افهمني مانيب صغير .. وأعرف وش قاعد اقول ..
بس بدق يعني بدق ...........
متوتر والله وش اقولها .......
ولا تدري ارسلها مسج .. أفضل .



هنا أبدأ بفصل البنات مره أخرى ...... أرجع لهم ..
الأخوات . سلوى وهناء ..
بنات عمهم . تهاني . أريج . أفنان

دلع . وضحك . وسوالف بنات .. قصصهم مغامراتهم ..
كان يوم حافل فطور ذالك اليوم . ستار بكس .. ..
رجعوا من جده وناموا اليوم كله الى الساعات الأولى من العشاء ..

وأم نافع تتذمر منهم ..
كل هذا نوم .. وش هذا ..يالا قومن ..

هناء .. كالعاده ترافق امها كثيرا ..
يمه خليهم ينامون تدرين السهر ......... ها يمه ما قلتي متى السفر انشاءالله .. تكفين يمه كل صديقاتي وصلوا . ويقولون الجو مره خيال و زحمة .. ما ابي
أتأخر أكثر يمه تكفين ..... يلا عاد ..

ام نافع .. حبيبتي .. انشاءالله رحلتنا السبت بإذن الله ....
هناء ........ يااااااااي يمه خلاص . يعني كم يوم باقي.. الخميس . يوه بس يومين ..

هناء تدخل غرف النوم وبعد وسائل التعذيب من الرش بالماء . الى سحب البطانيات .
او اقفال التكيف ومن ثم فتح الأنوار . او الصراخ بصوت عال بأذن كل واحده ..
يلا قومواااااا .. بسكم نووووووووووووم . .
.. البنات . كلهم يصرخون يتذمرون .. والله يا هناء بيجي لك يوم ..
Mar00m غير متصل  
قديم 07-10-2008, 10:41 AM   #7 (permalink)
Mar00m
رومانسي مبتديء
 
الجزء الثامن ..

وبعد صلاة الجمعه في الحرم المكي . توجهوا الى جده .. الى فندق هيلتون .
وبعد توزعوهم بأجنحة الفندق ..

هناء .. قوموا نطلع ... ليه نقعد هينا بالفندق ...ودي نطلع يلا مين تيجي معي..
طبعا لم تخرج مع هناء . غير تهاني وأفنان ..

هناء ..تضحك .. صدق لا قالوا جده غير .. وش هالتميز الي يتميزون بها ..
الكل ماخذ راحته ..
احيانا اضحك لما اشوف الي من برا السعوديه يعرفون ديرتنا احسن منا ..
احنا ما غير في كل اجازه مسافرين برا ..
من اول يوم ناخذ اجازه من هالدراسه
لليوم الي قبل الدراسه بيوم ..

تضحك افنان بسخريه .. يعني وين الهيئه عنهم هينا .............!!
وراهم ما يطبون جده .. ولا جده حدودها مخططه بقلم أحمر ..
ياختي احس مانيب بالسعوديه ..
إلا كلامهم مستفز مره ..


وفي هذي اللحظه ..
واذا بنغمة المسج .. على انغام اغنية ( ايه احبك واعترافي لك كفايه . نبض قلبي وانشغالي هو الدليل ))

أفنان ... تهاني شوفي جوالك .. ؟

تهاني ..... من منصور .. (( مساء الخير . عساني ما ازعجتك . تسمحين أتصل واخذ من وقتك شوي اذا مافيه مانع .. ))
وبصوت كله ثقه .. وكبرياء .. شفتي يا هناء مين الي رسل المسج .. خذي اقريه ..


هناء . والله ما توقعت انه يرسل هذا منصور ..
تهاني .. والله كنت واثقه انه بيرسل او يسأل ..
أفنان .. يعني الحين انتي بتردين عليه ؟؟

هناء .. لا هذا ولا ذاك ... وليه أصلا تكلمينه .. ماعندك سالفة تهاني ..
هذا واحد ونصحتيه ويعتبر في علاقة مع بدرية النجدي و يحبها .. . وش يبي منك بعد ؟؟
وغير كذا بعد أخو منتهى . يعني اخو صديقتك ....؟
وفوق هذا وذاك .. ماله داعي . احسكم زودتها انتوا يالبنات . والله
قلنا ننبسط و نسوي حركات بس انا شايفه من الأول مكالمة عيال والخرابيط هذي ..
شيء بصراحه باااااااايخ ..

تهاني .. والله هذا رأيك واحتفظي فيه لنفسك . بعدين مين قالكم اني بسوي برأيكم ..
بس حبيت أقولكم .. الأحداث لا أكثر ولا أقل .. وبالنهايه بسوي الي
انا ودي اسويه ...............

تهاني ...... ترسل مسجها ........(( مساء النور . .. اخوي انشاء الله خير .!! ))
ومع رد تهاني على منصور بهذه الرساله .......... نضيف فصلا أخر من فصول العلاقات .. العجيبه الي لا نعرف كيف تبدأ او كيف ستكون نهايتها ..

لا تعرف تهاني انه لربما الوافي ليس مثل البقيه الذين تعرفهم .. .. تهاني . أرادت بهذه الخطوه .. أن تقنع ذاتها انها بذالك قد أقنعت الجميع وعرفت أن تثبت أنها تجذب الناس بطريقه او بأخرى ..
أو لربما هي عقدة النقص عند تهاني .. او حب إعجاب الأخرين بها ..

تهاني شخصيه لم اعرف كيف أصفها ..
تارة مع الموج . وتاره تخالف الرياح .. ولن تتوارى بأن تقدم على شيء بإقتناعها بالخاص .
وأنها بذالك سوف تحقق ذاتها ..
وتهاني عندما قالت للجميع .. عن مسج منصور ..
ليس بغرض أخذ أرائهم إنما بقصد أن تغيظ هناء ..
دائما هناك اختلاف بينهم سواء في وجهات النظر
او حتى بالحديث بشكل عام ..
.. ومما زاد الحقد ربما بقلب تهاني .
. هو .. (( محمد إبن خالة تهاني ))
محمد .. الذي كانت تهاني تكن له أشد الأعجاب لدرجة ان الجميع قد تصور أن (( محمد لتهاني )) والعكس صحيح ..
وبعدما تخرج محمد من جامعة البترول والمعادن .. تقدم ببعثة لدراسة الماجستير بأمريكا .
وطلب من والدته ان يخطب له هناء ..
بالرغم من إلحاح والدته
الشديده بخطبة تهاني . وانها تليق به ومن أصناف المديح .
إلا انه رفض وبشده تهاني ..

محمد لطالما صادف سلوى وهناء في سفرياتهم للخارج وغالبا ما كان يكن الأعجاب المخفي بهناء منذ سنوات ..وقد أعجب بها جدا في أخر سفريه لهم ..

وعندما عرفت تهاني بالخبر .. كانت الصدمه والفاجعه بالنسبة لكبريائها أمام الجميع ....
فهي من كانت تجلس في كل مجلس تذكره بأجمل الألقاب وتوصفه
بأحسن الأوصاف... كيف يطلب هناء .. ومن تكون هناء .. مالفارق بيننا ..

ومن هنا بدأت الضغينه المخفيه منذ سنوات ..

لا تنسى تهاني نفسها وهي منهاره وقد أغمي عليها حينما كانت في السوليدير حينما سمعت من زوجة عمها ( أم نافع ) ان محمد إبن خالتها قد خطب هناء ..
وقضت تهاني ما يقارب الأسبوع في المستشفى في بيروت وهي في وضع سيء جدا ..
ولا تنسى ايضا موقف هناء حينما ذهبت ل تهاني في المستشفى تخبرها انها رفضت محمد حبا في بنت عمها تهاني . وانها لن تقبل به لو كان أخر رجل في حياتها ..

أخفت تهاني ملامح الفرحه لحظة سماعها خبر رفض هناء لمحمد ..
لكنها أقسمت . بأن تذيق محمد العذاب مرات كما أذاقه لها .. .............
Mar00m غير متصل  
قديم 07-10-2008, 10:41 AM   #8 (permalink)
Mar00m
رومانسي مبتديء
 
الجزء رقم 9 ..

إتصل منصور على تهاني ..

وبعد صوت الدلع والغنج من تهاني .. وكأنها تتحدث لأول مره مع منصور ..؟؟
وكأنها نسيت من هي ؟؟
هي الي اتصلت عليه أول مره .. تحذره من بدريه النجدي ..
هي ............. تهاني ..

كانت مكالمة منصور مفاجئه للجميع ...
انسحبت تهاني الى جناحها ..
وهي تلوح بيدها للجميع بأن لا تقترب أي واحده من البنات لغرفتها . ..
هذه المكالمه هي انطباع منصور التي سوف يأخذها عن تهاني ..
تهاني تحاول جاهده في هذه المكالمه ان تكون طبيعيه .. خجوله ..مرحه ...
وهاهي تصطنع الضحكه حتى ..؟


وتردد تهاني بعض المصطلحات التي هي واثقه كل الثقه تؤثر بها على أي شاب ..
(( يااااي .. .. صدق والله .. يا بعد حيي ..)) نعم هذه كلمات عاديه .. لكن من التي تتحدث هذه تهاني ..
تهاني .. التي تمتلك حنجره ناعمه .. فيها الكثير من الدلع ..
الدلع الذي .. سلب الكثير من شبابنا ..
شبابنا يبحثون عن الأنوثه الطاغيه هذه ..

منصور ... وبهدوءه .. وثقل شخصيته ..
جعل من تهاني تبالغ في بعض ردود أفعالها في المكالمه ..
فهي تريد بأي طريقه
أن تجذب منصور .. وتجعله لا يندم على الخطوه الذي اقدم عليها وهي مكالمة تهاني ..

ولربما لن أبالغ لو قلت أن تهاني في بعض الأحيان تجلس مع اخواتها وتقول لهم ..
ليه ما تبون تفهمون .. يا بنات اتدلعوا شوي ..
يعني الضحكه حاولوا تمثلون فيها شوي خلوها مغريه .
وش فيها يعني تموتون ؟

تهاني .......وبطريقة غير مباشره وضحت لمنصور انها مسافره الى لندن غداً السبت .
وانها سوف تنقطع فتره ..
وكأنها تريد بذلك ان تعرف فقط .. هل استطاعت ان تجذب منصور ام لا ؟
وكما كان متوقعا قبل أن تنهي المكالمه قالها منصور ..

دائما تفوز تهاني بالرهان ..
منصور مرة أخرى .. (( عندي طلب بسيط اذا ما اثقل عليك .. طمنيني عليك لما توصلين لندن ))
تهاني .. (( وبنفس الدلع الذي تعودنا عليها . م م اي انشاء الله بحاول .. ))


فصل أخر ..
البنات في مطار الملك عبدالعزيز الدولي . ..
تعلن الخطوط السعوديه اقلاع رحلتها 7112
والمتجهه بمشئة الله تعالى الى لندن ..
وبصراحه تامه لم تحتاج البنات بأن ينتظرن ركوب الطائره حتى بدأن بخلع ورمي العباءات ..
وكل واحده منهن في كامل اناقتها .. فهناك بالحسبان بأن المطارات مكان لتعارف أيضا ..
فهناك نظرات المسافرين المتجهين لنفس الرحله ..
وكل واحد يتوعد الأخر بأن اللقاء ربما في
أسواق لندن .. او شوارعها أو أو أو

ومع فخامة الدرجة الأولى لم تقاوم أم نافع والبنات هذه الراحه واستغرقن في النوم طوال الرحله الى لندن ..

-------------------------
********************************************

بالرغم من أن مكالمات منصور مع تهاني لم تتجاوز الثلاث مكالمات وأربع مسجات ..
إلى أنها أخذت
الكثير من تفكير منصور ..
وبعد مضي أقل من أسبوع تقريبا على سفر البنات الى لندن ..


وأخذ يقلب في رسائل جواله ..
وإذا بأخر رساله من بدرية النجدي ..

اتصل منصور على بدرية .. يريد أن يهني العلاقه بأي طريقه ..

دار نقاش جاد بينهما أعرب خلال المكالمه أن العلاقه انتهت منذ فترة وأنه لن يرضخ
لمحاولات الرجوع البائسه هذه .. مره اخرى ..


قالها منصور ..
اسمعي يا بدريه .. كلمه وحده اقولها لك ..
رقمي هذا لا عاد تدقين عليه .... وترى ألزم ما عليك كرامتك .. من البدايه قايل لك انا علاقتي ما تستمر
و زين مني اني قدرت اواصل معك سنتين .
.خلاص يا بنت الناس .
شوفي طريقك وبعدين انا عندي مشاكل مع أهلي ومانيب ناقص مشاكل معك بعد .. اسمعي انا احبك .
بس ما نتفق بأشياء كثيره يا بدريه ..
افهميني تكفين . ترى ما ودي أجرحك أكثر ..

بدريه ..
تتحدث وصوتها ينقطع من كثر البكاء ..
بس يا منصور .. وربي ما اقدر . أحس بشي بقلبي وربي ما اقدر اتنفس
بدريه تبكي لا تستطيع حتى أن تكمل جملها

وهي تقول
.. لا منصور موب كذا .. ما اتفقنا على الشيء هذا ... الله يوفقك لا تتركني ..
بالله لا تخليني..
خلاص قلي .. وش سويت علشان تقولي كذا ..
بإيش قصرت معك . والله بتغير بس قلي ؟؟


وقبل أن تكمل حديثها ..
تحدث بلهجه حاده جدا .. اقول بدريه عن الدلع الي عندك .
قلت لك
لا .......... تفهمين
يلا فمان الله الشباب جاو عندي .. ولا عاد تدقين ..
واستروا على ما واجهتوا ..


بدريه
............................................
Mar00m غير متصل  
قديم 07-10-2008, 11:24 AM   #9 (permalink)
أمـ الذوق ـير
عطر الرومانسية
 
الصورة الرمزية أمـ الذوق ـير
 
قصة طويلة ... لا كنها جميله ...

شلح العبايات هذا مسلسل متكرر بذات في الرحلات الى الدول الأروبية ..


يسلموووو على القصة ,,
أمـ الذوق ـير غير متصل  
قديم 07-13-2008, 10:20 AM   #10 (permalink)
Mar00m
رومانسي مبتديء
 
شكرا لكرورك امير الذوق
فعلا رواية طويلة وارجو ان تستمر في المتابعة
Mar00m غير متصل  
موضوع مغلق

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are معطلة


المواضيع المتشابهه
الموضوع كاتب الموضوع المنتدى مشاركات آخر مشاركة
المعالم المحرمة ... الانثى....الذكر .... فصول العلاقات Mar00m قصص وحكايات عربية وشعبية وعالمية 0 07-08-2008 01:46 PM
.: المعالم الاثرية و السياحية بالإسكندرية :. أسومة سياحة افريقيا و فنادق افريقيا و عروض سفر افريقيا 15 12-07-2006 11:54 PM
( فصول السنة ) memooooooooO خواطر , عذب الكلام والخواطر 2 06-06-2006 04:31 PM
عندما انقلب الذكر لانثى و الانثى لذكر Ops مشكلتي | أريد حلاً 7 03-23-2006 04:15 AM
ايهما اسرع في عمليةالتبول ((الذكر ام الانثى ))ثقافة علمية دون شهوة جنسية للمعلومة شفايف الليل المنتدى العام - نقاشات و حوارات جادة هادفة 0 11-08-2004 03:17 AM

الساعة الآن 09:28 PM


Powered by vBulletin® Copyright ©2000 - 2019, Jelsoft Enterprises Ltd. TranZ By Almuhajir
Search Engine Friendly URLs by vBSEO 3.6.0
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103